खैरहनी नगरपालिकाले ल्यायो चालु आर्थिक वर्षको भन्दा ४१ करोड बढी कम बजेट

चितवन,११ असार। चितवनको खैरहनी नगरपालिकाको बजेटको आकार घटेको छ । नगरपालिकाका उपप्रमुख कविता उप्रेतीले पेस गरेको आगामी आर्थिक वर्षको बजेट चालु आर्थिक वर्षको भन्दा ४१ करोड ३४ लाख ८० हजार कम छ ।

नगरपालिकाले आगामी आर्थिक बर्षका लागि ९४ करोड ८८ लाख ९५ हजारको बजेट पेस गरेको छ । चालु आर्थिक वर्षका लागि गत वर्ष संशोधित एक अर्ब ३६ करोड २३ लाख ७७ हजारको बजेट पेस गरिएको थियो । आगामी आर्थिक वर्षका लागि नगरपालिकाले चालु खर्चतर्फ ४८ करोड २६ लाख ८४ हजार –५०.८६ प्रतिशत) र पुँजीगततर्फ ४६ करोड ६२ लाख ११ हजार –४९.१४प्रतिशत) बजेट विनियोजन गरेको छ ।

नगरसभामा पेस भएको विवरण अनुसार आगामी आर्थिक वर्षका लागि पेस भएको बजेट आर्थिक वर्ष २०७८÷७९ को यथार्थभन्दा ०.९६ प्रतिशत बढी हो भने, चालु आर्थिक वर्षको भन्दा २८.२४ प्रतिशतले कम हो ।

नगरपालिकाले आगामी आर्थिक वर्ष आन्तरिक आय १७ करोड ७० लाख ३८ हजार, संघीय सरकारको सशर्त अनुदान २४ करोड १४ लाख, समानीकरण अनुदान १५ करोड ७६ लाख र संघीय सरकारबाट बाँडफाँट भई प्राप्त हुने ११ करोड ३४ लाख २० हजार, भारतीय राजदूतावासबाट प्राप्त हुने आय एक करोड र चालु आर्थिक वर्षको अनुमानित बैंक मौजदात चार करोड गरी नगरपालिकाले ९४ करोड ८८ लाख ९५ हजार आय अनुमान गरेको छ ।

यस्तै व्ययतर्फ कार्यसञ्चालन तथा प्रशासनिक खर्च ११ करोड ९९ लाख, नगरस्तरीय गौरवका आयोजनामा सात करोड ७० लाख, नगरस्तरीय योजना तथा कार्यक्रम खर्च तर्फ ४९ लाख २५ हजार, नगरस्तरीय पूर्वाधारका कार्यक्रमहरु तीन करोड ४० लाख ४० हजार खर्च हुने अनुमान छ ।

वडास्तरीय योजना तर्फ १७ करोड २६ लाख, विषयगत शाखा तर्फ १४ करोड ५ लाख, नगरस्तरीय विभिन्न कोषतर्फ एक करोड ५० लाख, म्याचिङ फण्डमा दुई करोड र अन्तर सरकारी वित्तीय हस्तान्तरण तर्फ ३६ करोड ४९ लाख ३० हजार गरी जम्मा ९४ करोड ८८ लाख ९५ हजार व्यय अनुमान गरिएको छ ।