गैंडाकोटले नदीजन्य पदार्थको आधा रोयल्टी भरतपुलाई दिने

चितवन,४ असार । गैंडाकोट नगरपालिकाले नदीजन्य पदार्थ विक्रीबाट प्राप्त भएको रोयल्टीको आधा रकम भरतपुर महानगरपालिकालाई दिने भएको छ । महानगरसँग भएको सहमति बमोजिम रोयल्टीको ५० प्रतिशत रकम भरतपुरलाई दिने निर्णय जेठ २८ गते बसेको गैंडाकोट नगरपालिकाको १६औँ नगर कार्यपालिका बैठकले गरेको हो ।

नारायणी नदीको सिमाबाट उत्खनन् गरिएको नदीजन्य पदार्थको रोयल्टी दुवै पालिकाले बराबर लिने सहमति भएको थियो । नदीको बीचबाट निकालिएको ३० हजार घनमिटर नदीजन्य पदार्थको रोयल्टी दुई पालिकाले बाँड्ने सहमति भएको गैंडाकोट नगरपालिकाका प्रमुख प्रशासकिय अधिकृत मुक्तिराम रिजालले बताए ।

सहमति बमोजिम भरतपुरलाई करिब ४२ लाख रुपैयाँ दिनुपर्ने देखिएको रिजालले जानकारी दिए । नदीको बीचबाट निकालिएको नदीजन्य पदार्थको रोयल्टीको ५० प्रतिशत रकम भरतपुरलाई दिँदै गर्दा गैंडाकोटका स्थानीयले मोटरबोटबाट उठेको रोयल्टीमा पनि चासो देखाएका छन् ।

भरतपुरतर्फबाट नारायणी नदीमा सञ्चालित मोटरबोटले महानगरलाई रोयल्टी बुझाउँदै आएका छन् । मोटरबोटहरु नदीको सिमाबाट गैंडाकोटतर्फ पनि जाने गरेको भन्दै नगरपालिकाले मोटरबोटबाट उठेको रोयल्टी पनि गैंडाकोटले पाउनुपर्ने जनाएको छ ।