प्रेस चौतारीको भवन निर्माण गर्न हामी सबै लागौंँ : उपमहासचिव गुरुङ

चितवन, १६ जेठ । नेकपा (एमाले) का उपमहासचिव एवं प्रेस चौतारी इञ्चार्ज पृथ्वीसुब्बा गुरुङले प्रेस चौतारी चितवनले निर्माण गर्न लागेको भवनको काम सबै मिलेर सम्पन्न गर्नुपर्ने बताउनु भएको छ । भरतपुर महानगरपालिका वडा नं. ११ मा निर्माणाधिन भवनको आज निरीक्षणपछि बोल्दै गुरुङले चितवनको कामका केन्द्र र अरु जिल्लाले पनि सिक्न पर्ने बताउनु भएको हो ।

उहाँले भन्नुभयो “चितवनका साथीहरुले जुन खालको सिर्जनशील काम गर्नुभएको छ, पहलकदमी शुरु गर्नु भएको, यो केन्द्रले पनि सिकोस्, अरु जिल्लाले पनि सिकुन । यो काम पूरा गर्न हामी सबैं लागौं ।” पार्टीले पनि आवश्यक सहयोग गर्नुपर्ने भन्दै उहाँले अगाडि थप्नुभयो “प्रेस चौतारीका सम्पूर्ण पत्रकारहरु मिहिन ढंगले लागेर यसलाई सफल पार्नुपर्छ ।” चौतारीमा यस अघि नभएको काम चितवनले गर्न लागेको भन्दै गुरुङले भन्नुभयो “चौतारीमा यस अघि नभएको काम तपाईहरुले गर्न खोज्दै हुनुहुन्छ, यसमा तपाईहरुलाई सफलता मिलोस्, म शुभकामना दिन चाहन्छु ।”