भरतपुरका सबै सामुदायिक विद्यालयलाई नारायणी मावि जस्तै उत्कृष्ट बनाउँछु: मेयर दाहाल

चितवन, २ जेठ । भरतपुर महानगरपालिकाकी मेयर रेनु दाहालले भरतपुरका सबै सामुदायिक विद्यालयलाई नारायणी माविको जस्तै नमुना बनाउने बताएकी छन् ।

भरतपुर–२५ मा रहेको राष्ट्रिय माध्यमिक विद्यालय सोसीमा विद्याथीहरुलाई शैक्षिक सामग्री बितरण कार्यक्रमलाई सम्बोधन गर्दै देशकै उत्कृष्ट स्थानमा रहेको नारायणी मावि जस्तै अन्य विद्यालयहरु प्नि बनाउने दाबी गरेकी हुन् ।

मेयर दाहालले पहिलो र दोस्रो स्थानमा नारायणी मावि हुनु भरतपुरको लागि गर्वको विषय भएको उल्लेख गरिन् । भरतपुर महानगरपालिकाको एक वडा विद्यालय एक नमुना विद्यालय, एक कक्षा कोठा एक शिक्षक ,स्वम्सेवक शिक्षा, दरबन्दी मिलान जस्ता कार्यले सामुदायिक विद्यालयको शैक्षिक गुणस्तर वृद्धि हुँदै गएको उनको दाबी थियो ।

मेयर दाहालले भरतपुरका सामुदायिक विद्यालयमा भइरहेको विद्यार्थीको संख्या वृद्धि नै यसको मानक भएको उदाहरण दिइन् । अहिले विद्यार्थीको संख्या वृद्धि भएकाले धेरैजसो विद्यालयमा भवनहरु थप निर्माण गर्नुपर्ने अवस्था रहेको पनि उनले जानकारी दिइन् । भरतपुरका दुई हजार विद्यार्थीलाई शैक्षिक सामग्री बितरण गरिएको छ । भरतपुर वडा नम्बर २५ मा रहेको सोसी माध्यमिक विद्यालयका विद्यार्थीलाई सो सामग्री दिएर कार्यक्रमको शुभारम्भ गरिएको हो ।

साझापुर माविमा ३५५ जना, सोसी माविमा ४३६ जना, हिमालय दण्डपाणि माविमा २७८ जना, मोहन माविमा ४१४, सिद्धि जनकल्याण आद्यारभूत विद्यालयमा १४५ जना र ईन्द्रपुरी माविमा १०० जनाले सो सामग्री पाएका छन् ।