चितवन माविमा विद्यार्थीकै अगुवाईमा लोकनृत्य प्रतियोगिता सम्पन्न

चितवन । चितवन माध्यमिक विद्यालयमा बुधबार शुभकामना आदानप्रदान तथा लोकनृत्य प्रतियोगिता सम्पन्न भएको छ । बडादशैँ, तिहार तथा छठको शुभ अवसरमा कक्षा ९ ले आयोजना गरेको लोकनृत्य प्रतियोगितामा नम्रता घलेको समूह प्रथम, प्रतिष्ठा परियारको समूह द्वितीय र अनिशाको समूह तृतीय भएका विद्यालयका शिक्षक अच्युत पौडेलले जानकारी दिनुभयो ।

विद्यालय व्यवस्थापन समितिका अध्यक्ष डिल्लीराम लामिछाने ‘मिलन’ प्रमुख अतिथि रहनुभएको उक्त कार्यक्रममा विद्यार्थीहरुले आफ्नो प्रतिभा प्रस्तुत गरेका थिए । लामिछानेले यस्ता कार्यक्रमले विद्यार्थीहरुको प्रतिभा प्रस्फुटन गराउन सहयोग पुग्ने बताउनुभयो । उहाँले विद्यार्थीहरुको रचनात्मक कार्यक्रमलाई विद्यालय व्यवस्थापन समितिले सदैव सहयोग गर्ने पनि बताउनुभयो ।

कार्यक्रममा विद्यालयका प्रधानाध्यापक मुक्ति लामिछाने , विज्ञ समूहका संयोजक जगदिश्वर खनाल, सदस्य भानु प्रसाद उपाध्याय, विद्यालय व्यवस्थापन समितिका सदस्य हरेराम श्रेष्ठ, शिक्षक अभिभावक संघका अध्यक्ष ज्ञान बहादुर पाख्रिनलगायतले शुभकामना मन्तव्य व्यक्त गर्नु भएको थियो । कार्यक्रम कक्षा ९ कि छात्रा लिलासिंह ठकुरिको अध्यक्षता एवम् विद्यालयका वौद्धिक एवम् साँस्कृतिक समितिकि संयोजक शिक्षिका देवी श्रीशको संयोजनमा सम्पन्न भएको थियो ।