कामना सेवा विकास बैंकले मनायो अस्पताल सरसफाई गरेर संविधान दिवस

चितवन । कामना सेवा विकास बैंकले सरसफाई गरेर संविधान दिवस मनाएको छ । बैंकका चितवनमा रहेका पाँच वटा शाखाका कर्मचारीहरुले शुक्रबार भरतपुर अस्पताल परिसरको सरसफाई गरेका हुन् ।

नारायणगढ शाखाका प्रमुख सुशील भट्टराईका अनुसार बैंक र अस्पतालका कर्मचारीहरुले संयुक्त रुपमा सरसफाई गरेका थिए । सो अवसरमा सामाजिक उत्तरदायित्व अन्तर्गत बैंकको तर्फबाट अस्पताल परिसरमा आवश्यक डस्विन राखिएको छ ।

सरसफाईपछि आयोजित संक्षिप्त समापन कार्यक्रममा बोल्दै शाखा प्रमुख भट्टराईले भरतपुर अस्पतालमा बिरामीको चाप उच्च हुने हुँदा यसलाई सधैं सफा राख्नु पर्ने भएकोले आफूहरुले सरसफाई गरेको बताउनुभयो । आगामी दिनमा पनि बैंकले यस्ता कार्यक्रमलाई निरन्तरता दिने उहाँको भनाई थियो ।

कार्यक्रममा क्षेत्रीय प्रबन्धक सुरेन्द्र भण्डारी सहित ३२ जना कर्मचानरीहरुको सहभागिता रहेको थियो । कामना सेवा विकास बैंकले देशव्यापी रुपमा आआफ्नो शाखा नजिकको सार्वजनिक महत्वका स्थानमा संविधान दिवसको अवसरमा सरसफाई कार्यक्रम सञ्चालन गरेको थियो ।