असोज पहिलो साताबाट राष्ट्र बैंकले नयाँ नोट वितरण गर्ने, सर्वसाधारणले भने असोज १० गतेबाट पाउने

काठमाडौँ । नेपालीहरुका महान पर्व दसैं र तिहारका लागि राष्ट्र बैंकले असोज १० गतेदेखि सर्वसाधारणलाई नयाँ नोट वितरण गर्ने भएको छ । नयाँ नोट वितरणका लागि आन्तरिक तयारी पूरा भइसकेको राष्ट्र बैंक स्रोतले बताएको छ ।

बैंक तथा वित्तीय संस्थालाई भने असोज पहिलो सातादेखि नै नयाँ नोट वितरण गरिने छ। एक साता छिटो नयाँ नोट लिएपनि सर्वसाधारणका लागि बैंक तथा वित्तीय संस्थाले पनि असोज १० देखि नै नोट बाँड्ने जनाईएको छ ।

राष्ट्र बैंकले यो वर्ष १३ अर्ब रुपैयाँभन्दा बढीका नयाँ र सुकिला नोट वितरण गर्ने योजना बनाएको छ। गत वर्ष करिब १३ अर्ब रुपैयाँ बराबरका नोट वितरण गरिएको थियो ।

राष्ट्र बैंकले ५, १०, २०, ५०, १००, ५०० र १००० दरका नयाँ र सुकिला नोट वितरण गर्न लागेको हो। एजेन्सी