‘अक्षर अक्षरमा देश’ र ‘फर्कियौ किनारबाट’ माथि चितवनमा विमर्श

चितवन, १२ चैत । पोखराबाट आएका मुक्तककार दीपक समीप र मकवानपुरबाट आएका गजलकार विश्वनाथ सञ्जेलले चितवनमा आएर रचना वाचन गरेका छन् । समीपको मुक्तकसङ्ग्रह ‘अक्षर अक्षरमा देश’ र सञ्जेलको गजलसङ्ग्रह ‘फर्कियौ किनारबाट’माथि शनिबार भरतपुरस्थित रामेश्वर पुस्तकालय तथा वाचनालयमा भएको विमर्श कार्यक्रमका अवसरमा स्रस्टाहरूले रचना वाचन गरेका हुन् ।

कार्यक्रममा सञ्जेलले एक दर्जन गजल प्रस्तुत गरे । प्रणय भावमा लेखिएका गजलसँगै सञ्जेलले समसामयिक बिषयमा लेखिएका गजल पनि सुनाए । त्यसैगरी समीपले करिव डेढ दर्जन मुक्तक प्रस्तुत गरे । समीपले समसामयिक बिषयमा लेखिएका चोटिला मुक्तकहरू सुनाएका थिए । राजनीतिक विसंगतिमाथि लेखिएका रचना प्रस्तुत भैरहँदा कार्यक्रममा उपस्थित भएका भरतपुर महानगरपालिका वडा नम्बर २ का वडाध्यक्ष पूर्णबहादुर श्रेष्ठले चाख मानेर रचना सुनेका थिए । कार्यक्रममा बोल्दै श्रेष्ठले स्रष्टाका रचनाले जनप्रतिनिधिलाई राम्रो ढंगले जनसेवा गर्न प्रोत्साहन मिलेको बताए ।

मुक्तकसङ्ग्रहमाथि समीक्षक रमेश प्रभातले टिप्पणी राखे । समीपका मुक्तकमा स्रस्टाले आफ्नो मुलुकको बारेमा गरेको चिन्तन समेटिएको बताए । गजलसङ्ग्रहमाथि बोल्दै समीक्षक शान्ति शर्माले सञ्जेलको सङ्ग्रहमा विभिन्न धारका गजलहरू समेटिएको बताइन् ।

कार्यक्रममा रचना वाचनपछि मुक्तक तथा गजल संरचना र लेखिँदै आइएको परम्पराका बारेमा अन्तरक्रिया समेत गरिएको थियोे । प्रमुख अतिथि गायत्री श्रेष्ठले गजल र मुक्तकमा प्रेम, मानवीयता, विसंगति सबै समिटिएको बताउँदै चितवनमा बसेर राम्रा गजल र मुक्तक सुन्न पाएको बताइन् । सम्पूर्ण किताबका लेखराम सापकोटाले सहजीकरण गरेको कार्यक्रमलाई रामेश्वर पुस्तकालय तथा वाचनालयका अध्यक्ष बालकृष्ण थपलियाले अध्यक्षता गरेका थिए ।

कार्यक्रममा चितवन साहित्य परिषद्का अध्यक्ष सुरेन्द्र अस्तफल, कविडाँडा साहित्य समाजका सचिव गणेश श्रमण, अक्षर समुहका पूर्व अध्यक्ष ईश्वर कंडेल, भरतपुर प्रज्ञा प्रतिष्ठानकी परिषद सदस्य विष्णु तिवारी उषा, पुस्तकालयका सचिव विष्णुप्रसाद वाग्लेलगायत दर्जनौ स्रष्टाहरूको सहभागिता रहेको थियो ।