निस्सालाई लालपूर्जा भनेर जनता झुक्याउने काम भएको छ : उपाध्यक्ष पाण्डे

चितवन, २१ फागुन । राष्ट्रिय प्रजातन्त्र पार्टीका उपाध्यक्ष विक्रम पाण्डेले निस्सालाई लालपुर्जा भनेर जनता झुक्याउने काम भएको बताउनु भएको छ । भरतपुरको ज्ञानेश्वर सामुदायिक वनमा आयोजित बृहत नगरभेला तथा पार्टी प्रवेश कार्यक्रमलाई आज सम्बोधन गर्दै उहाँले लालपुर्जा दिन सरकार असफल बनेको बताउनु भएको हो ।

उहाँले गएको निर्वाचनमा गरेका वाचाहरु पूरा गर्न नसकेर अहिले जनता झुक्याउने काम गरेको बताउँदै भन्नुभयो “चुनावमा घरघर लालपुर्जा दिन्छु भने, अहिल निस्सा बाँड्दै हिडेका छन् ।” आयोगको छापविनाको निस्सा बाँडेर जनतालाई झुक्याउने कामको खबरदारी गरौँ गर्न उहाँले आग्रह गर्नुभयो । भूमिहिन तथा सुकुम्बासीलाई चुनाव जितेर गएपछि बिर्सिएकाहरुले चुनावको मुखमा निस्सा बाँड्दै हिड्न थालेको उहाँको भनाई छ । उहाँले अगाडि थप्नुभयो “लालपुर्जा वितरण गरौँ, भूमीको स्वामित्व दिन लाग्नुपर्छ । बसिरहेको घर तथा जग्गाको निस्सा अर्थात चिटले समस्या हल हुँदैन ।”

फरक प्रसंगमा उहाँले एमसीसी सम्झौता अनुमोदन गर्दा गरिएको व्याख्यात्मक टिप्पणी अर्थहिन भएको बताउनुभयो । दुई देशबीच भएको सम्झौता एकतर्फी निर्णय गरेर संसोधन गरिएको भनेर जनतामा भ्रम छर्ने काम भएको उहाँले बताउनुभयो । उहाँले भन्नुभयो “ठूलो दलहरु सम्पत्ति हिनामिना गर्दा, देश बेच्दा एक ढिक्का बन्ने गरेको एमसीसी अनुमोदन गर्दा देखिएको छ ।” उहाँले देश बेच्नेहरुलाई परास्त गर्न राष्ट्रवादी शक्तिहरु एकहुनुपर्नेमा जोड दिनुभयो । “युक्रेनमा रुसले आक्रमण गर्दा राष्ट्रवादी शक्तिहरुले प्रतिवाद गरेजस्तै देश बेच्नेहरुलाई देशबाटै लखेट्नुपर्छ”, पूर्वमन्त्री पाण्डेले भन्नुभयो, “देश बचाउन सबै एकजुट बनौँ ।”

राप्रपा भरतपुर महानगर कमिटीले आयोजना गरेको नगरभेलामा अन्य पार्टी परित्याग गरेर आउनेहरुलाई पार्टी प्रवेश गराइएको छ । आज ५ सय ७० जना राप्रपा प्रवेश गरेका छन् ।

नगर अध्यक्ष दिपक थापामगरको सभापतित्वमा भएको कार्यक्रम सचिव सुलभ सिग्देलले सञ्चालन गर्नुभएको थियो । कार्यक्रममा मदन पौडेल, ज्ञानजंग लामा, उर्मिला पाण्डे लगायतले बोल्नु भएको थियो ।