एकीकृत समाजवादीद्वारा एमसीसीको विपक्षमा मतदान गर्ने निर्णय

काठमाडौं, । सत्तारुढ दल नेकपा (एकीकृत समाजवादी) ले संसद्मा टेबल भएको अमेरिकी सहयोग परियोजना मिलेनियम च्यालेन्ज कर्पोरेशन (एमसीसी) सम्झौताको विपक्षमा मतदान गर्ने निर्णय गरेको छ ।

एमसीसी सम्झौता संसदमा टेवुल गरेपछि उत्पन्न चरम विवादको विषयलाई लिएर एकीकृत समाजवादीले बोलाएको सचिवालय बैठकले सो निर्णय गरेको सो पार्टीका एक नेताले बताए।

आज बसेको एकीकृत समाजवादीको सचिवालय बैठकले एमसीसीको विपक्षमा उभिने निर्णय गरेको हो । साथै एकीकृत समाजवादीले एमसीसीको विपक्षमा उभिनका लागि सबैलाई भन्ने र वातावरण तयार गर्ने पनि भएको छ । साथै उक्त पार्टीको सचिवालय बैठक भोलि पनि बस्नेछ ।

शनिबार बसेको स्थायी कमिटी बैठकले एमसीसीबारे निर्णय लिने अधिकार सचिवालय बैठकलाई दिएको थियो । यद्यपि एकीकृत समाजवादीले एमसीसी संसदमा पेश गर्न दिने निर्णय चाहिँ यसअघि नै गरेको थियो । सोमबारको प्रतिनिधिसभामा एमसीसी पेश भएपछि एकीकृत समाजवादीको आज सचिवालय बैठक बसेको थियो ।