भरतपुर १ मा स्वागत तथा सम्मान

भरतपुर, ३ फागुन । नेकपा (एमाले) चितवनको जिल्ला कमिटी तथा लेखा आयोगमा चयन हुनु भएकालाई आज एक कार्यक्रमबीच स्वागत तथा सम्मान गरिएको छ । भरतपुर महानगरपालिका वडा नं १ का सन्देश कुमार श्रेष्ठ, प्रह्लाद प्रधान तथा लेखा आयोग सचिव राजेन्द्र कुमार पियालाई स्वागत तथा सम्मान गरिएको हो ।

वडा न १ कमिटीका अध्यक्ष शुक्रकुमार श्रेष्ठको अध्यक्षता सम्पन्न कार्यक्रममा नेकपा एमाले वाग्मती प्रदेश कमिटीका सदस्य नारायण अधिकारी प्रमुख अतिथि रहनु भएको थियो । सम्मानप्रति धन्यवाद व्यक्त गर्दै नवनिर्वाचित सदस्यहरूका तर्फबाट लेखा आयोगका सचिव राजेन्द्र कुमार पियाले नेकपा एमालेलाई थप मजबुत तथा लोकप्रिय पार्टीको रूपमा स्थापित गर्न आफूहरू जुनसुकै मूल्य चुकाउन तयार रहने बताउनुभयो । उहाँले आफूलाई सुम्पिएको जिम्मेवारी पनि इमान्दार भई पूरा गर्ने प्रतिबद्धता व्यक्त गर्नुभयो ।

कार्यक्रमका प्रमुख अतिथि अधिकारीले आगामी वैशाख ३० गते हुने स्थानीय निर्वाचनमा डटेर लाग्न कार्यकर्तालाई निर्देशन दिनुभयो । भरतपुर महानगरपालिकाका २९ वटै वडामा नेकपा एमालेले जितको झन्डा फहराउने उद्घोष उहाँले गर्नुभयो । भरतपुर महानगरवासीको जीवनमा विकास तथा समृद्धिको आभाष दिलाउने प्रमुख उद्देश्यका साथ लाग्न पनि उहाँले सम्पूर्ण कार्यकर्ताहरूलाई आग्रह गर्नुभयो ।