भरतपुर अस्पतालका सात चिकित्सकसहित ३७ स्वास्थ्यकर्मीलाई कोरोना संक्रमण

भरतपुर, ४ माघ । भरतपुर अस्पतालका ३७ जना चिकित्सक कर्मचारी कोभिड–१९ बाट संक्रमित भएका छन् । अस्पतालमा संक्रमितको संख्या बढ्दै जाँदा सेवा प्रवाहमा कठिनाई उत्पन्न भएको हो ।

सोमबार गरिएको परीक्षणमा अस्पतालमा कार्यरत सात जना चिकित्सकसहित ३७ जना स्वास्थ्यकर्मीलाई कोरोना पुष्टि भएको हो । मेसु प्रा. डा. कृष्ण पौडेलका अनुसार संक्रमित हुनेहरुमा १५ जना स्टाफ नर्स रहेका छन् ।

यस्तै फार्मेसीका चार, प्रशासनका दुई तथा एमरजेन्सीमा कार्यरत केही स्वास्थ्यकर्मीहरुलाई पनि कोरोना पुष्टि भएको डा. पौडेलले जानकारी दिए । अस्पतालको प्रहरी बिटका एक प्रहरी हवलदारलाई पनि कोरोना देखिएको छ । सबै भन्दा पहिला उनलाई नै कोरोना देखिएको डा. पौडेलले बताए ।

आज (मंगलबार) अन्य स्वास्थ्यकर्मीहरुको स्वाब परीक्षण हुने भएकोले संक्रमितको संख्या बढ्न सक्ने उनले बताए ।”हिजोको परीक्षणमा ३७ जना हो, उनले भने, आज पनि स्वाब टेस्ट हुन्छ । अझै बढ्न सक्छ ।” उनका अनुसार संक्रमित सबै स्वास्थ्यकर्मीको अवस्था सामान्य छ । उनीहरु सबै होम आइसोलेसनमा छन् । संक्रमित अझै बढ्न सक्ने भएकोले अस्पतालबाट हुने सेवा प्रवाह कटौती गर्नुपर्ने अवस्था आउन सक्ने उनको भनाइ छ ।