सहायता सामग्री बोकेर नेपाली टोली अफगानिस्तान उड्यो

काठमाडौं,२ माघ । अफगानिस्तानका लागि सहायता सामग्री लिएर नेपाली परराष्ट्र मन्त्रालयको टोली अफगानिस्तान प्रस्थान गरेको छ ।

औषधि, लत्ताकपडा, भाँडाकुँडा लगायतका सामग्रीसहित टोली हिमालयन एयरलाइन्सको चार्टड विमानबाट अफगानिस्तानको राजधानी काबुलका लागि प्रस्थान गरेको हो ।

काबुल प्रस्थान गर्नुअघि विमानस्थलमा आयोजित पत्रकार सम्मेलनमा परराष्ट्र मन्त्री नारायण खड्काले सहायता औषधि, लत्ता कपडा, भाँडाकुँडा गरेर १४ टन सामग्री रहेको जानकारी दिएका छन् ।

परराष्ट्रमन्त्री खड्काले दक्षिण एसियाली क्षेत्रीय सहयोग सङ्गठन (सार्क)को सदस्य राष्ट्रको नाताले अफ्ठ्यारोमा सहयोग गर्नुपर्ने नैतिक जिम्मेजारी ठानेर अफगानिस्तानमा मानवीय सहयोग सामग्री पठाइएको जानकारी दिए ।

काबुल विमानस्थलमा राष्ट्रसंघका प्रतिनिधिलाई सहायता सामग्री हस्तान्तरण गरेर टोली आजै नेपाल फर्कने छ ।

तालिबानले सत्ता कब्जा गरेपछि अफगानिस्तानमा मानवीय संकट उत्पन्न भएको छ ।