पूर्वी चितवनको राप्ती नगर क्षेत्रका राजमार्गमा कफ्र्यु जारी, झडपमा डिएसपी सहित ८ प्रहरी घाईते

चितवन, २२ असार । पूर्वी चितवनका राप्ती नगरपालिकाभित्र पर्ने राजमार्ग क्षेत्रमा कफ्र्यु आदेश जारी गरिएको छ । सुजाता भण्डारी घटनामा तोडफोड र आगजनीका घटना हुन सक्ने भन्दै प्रशासनले कफ्र्यु आदेश जारी गरेको हो ।

प्रमुख जिल्ला अधिकारी प्रेमलाल लामिछानेद्वारा जारी आदेशमा पूर्वपश्चिम राजमार्गको राप्ती नगरपालिका वडा नं. १ लोथरपुलदेखि राप्ती नगरपालिका वडा नं. ४ डढुवासम्मको राजमार्गको दाया बायाँ पाँच सय मिटरभित्र पर्ने सबै क्षेत्रमा कफ्र्यु आदेश जारी गरिएको हो । आज साँझ ७ः३० बजेदेखि भोलि २३ गते बेलुकी ७ः३० बजेसम्मका लागि कफ्र्यु आदेश जारी गरिएको छ ।

झडपमा डिएसपी सहित ८ प्रहरी घाईते

यसैबीच, प्रदर्शनकारी र प्रहरी बीच आज साँझ झडप हुँदा ८ जना प्रहरी घाईते भएका छन् । जिल्ला प्रहरी कार्यालय चितवनले न्यूजभित्तोलाई दिएको जानकारी अनुसार सशस्त्र प्रहरीका डिएसपी सहित चार जना र नेपाल प्रहरीका चार जना घाईते भएका छन् । घाईतेहरुको उपचारको लागि भरतपुर ल्याईएको छ ।

असार ११ देखि सम्पर्कविहीन भएकी राप्ती नगरपालिका वडा नं. ३ की २३ वर्षीया सुजिता भण्डारीको शव आइतबार साँझ घरबाट करिब चार किलोमिटर पर ब्रह्मस्थानी सामुदायिक वनको झाडीभित्र मृत अवस्थामा भेटिएको थियो । सोमबार उनको शव घटनास्थलबाट ल्याई भरतपुर अस्पतालको शवगृहमा राखिएको छ । उक्त शव आज नै पोष्टमार्टमका लागि काठमाण्डौं पठाईएको छ । घटनाबारे प्रहरीले अनुसन्धान गरिरहेको छ ।