चितवनका महिला संघ संगठनद्वारा सुजिता घटनाको निष्पक्ष छानविनको माग

चितवन, २२ असार । जिल्लाका सात राजनीतिक दल निकट महिला संघ संगठनहरुले सुजिता भण्डारी घटनाको निष्पक्ष छानविनको माग गरेका छन् । उनीहरुले आज एक विज्ञप्ति प्रकाशित गरी निष्पक्ष, गहिरो र गम्भीर अनुसन्धान गरी दोषीलाई कडा कारवाही गर्न माग गरेका हुन् ।

जारी विज्ञप्तिमा यस्ता घटना पुनः नदोहोरिनका लागि कडाभन्दा कडा सजायको माग गरिएको छ । विज्ञप्तिमा अगाडि भनिएको छ “उक्त घटनाप्रति हाम्रो गम्भीर ध्यानाकर्षण भएको छ । जनस्तरबाट भएको न्यायिक आन्दोलनप्रति हाम्रो ऐक्यबद्धता छ ।” सुजिताले न्याय नपाउँदा सारा महिलामाथिको अपमान हुने उल्लेख गर्दै विज्ञप्तिमा भनिएको छ “सुजितालाई न्याय दिन राज्य नचुकोस् ।”

विज्ञप्तिमा नेपाल महिला संघका जिल्ला अध्यक्ष पार्वती शाह ठकुरी, अखिल नेपाल महिला संघ (क्रान्तिकारी) का केन्द्रीय अध्यक्ष अम्बिका मुडवरी, अखिल नेपाल प्रगतिशील महिला संघका केन्द्रीय बरिष्ठ उपाध्यक्ष भगवती घिमिरे, अखिल नेपाल महिला संघ (क्रान्तिकारी) चितवनका अध्यक्ष संगीता भट्टराईले हस्ताक्षर गर्नुभएको छ । यसैगरी अखिल नेपाल महिला संघ चितवनका अध्यक्ष सुशिला लामिछाने, समाजवादी महिला संघ चितवनका सचिव माया पोखरेल, अखिल नेपाल महिला संघ (राष्ट्रिय जनमोर्चा) चितवनका अध्यक्ष सीता आचार्यले हस्ताक्षर गर्नुभएको छ ।