मुलुक सम्बृद्ध नेपाल सुखी नेपालीको अवधारणासँगै डिजिटल नेपालको संकल्पमा समेत अघि बढेको छ: मन्त्री तुम्बाहाङ्फे

काठमाडौं, २ वैशाख । भूमी व्यवस्था, सहकारी तथा गरिबी निवारण मन्त्री डा.शिवमाया तुम्बाहाङ्फेले मुलुक सम्बृद्ध नेपाल सुखी नेपालीको अवधारणासँगै डिजिटल नेपालको संकल्पमा समेत अघि बढिसकेको बताएकी छन् । बिहिबार भूमी व्यवस्था सम्बन्धी डिजिटल अनलाइन प्रणाली ‘ल्याण्ड इन्फरमेसन सिस्टम (निलिस्)’ र ‘मेरो कित्ता’ सफ्टवेयरको सार्वजनिक कार्यक्रमलाई सम्बोधन गर्दै मन्त्री तुम्बाहाङ्फेले यस्तो बताएकी हुन् ।

‘हाल भूमी व्यवस्था तथा मालपोत कार्यालय र नापी कार्यालयमा व्यापक समस्या छ भन्ने जनगुनासाहरु आइरहेका छन् । पूर्व मेचीदेखि पश्चिम महाकालीसम्मका मालपोत कार्याल तथा नापी कार्यालयहरूले ऐनले दिएभन्दा विपरित पनि गएर जग्गाको कित्ताकाट तथा नामसारी हुने गरेको गुनासाहरू आइरहेका छन् । यसमा कर्मचारीहरु पूर्णत जिम्मेवार छन्’ मन्त्री तुम्बाहाङ्फेले भनिन्,  ‘यस्तो समस्या चिर्नलाई पनि सरकारले डिजिटल प्रविध ल्याएको हो ।’

प्रमुखतः सरकारले सेवाग्राहीहरुको सुविधालाई नै ध्यानमा राखेर डिजिटल प्रणालीको विकास गरेको बताइन् ।  सो अवसरमा उनले प्रविधिको विकाससँगै सेवाग्राहीहरुले पनि प्रविधि अनुसार आफुलाई अपेड गराउँदै जानुपर्ने बताइन् ।