बाढी–पहिरोमा परेका घर पुनःनिर्माणका लागि ५० करोड दिइने

काठमाडौं  २६ चैत। अघिल्लो वर्ष सिन्धुपाल्चोक, बाग्लुङसहितका जिल्लामा बाढी र पहिरोका कारण क्षति पुगेका घरको पुनःनिर्माणका लागि सरकारले ५० करोड दिने भएको छ । प्रधानमन्त्री केपी शर्मा ओलीको अध्यक्षतामा आज बसेको विपद् जोखिम न्यूनीकरण तथा व्यवस्थापन राष्ट्रिय परिषद् बैठकले पहिलो किस्ता स्वरुप ५० करोड दिने निर्णय गरेको हो ।

विपद् व्यवस्थापन कोषमा रहेको रकममध्ये ५० करोड रुपैयाँबाट तीन हजार घर पुनःनिर्माणका लागि रकम दिने निर्णय भएको परिषद्का सदस्य सचिव समेत रहेका विपद् जोखिम न्यूनीकरण तथा व्यवस्थापन प्राधिकरणका प्रमुख कार्यकारी अधिकृत अनिल पोखरेलले जानकारी दिए ।

उनले भने । ‘रकम यस अघि नै दिइसक्नुपर्ने हो । तर बजेट अभावका कारण रकम पठाउन सकेका थिएनौं । आजको परिषद् बैठकले निर्णय गरेको छ । अब तत्काल हामी पहिलो किस्ता रकम दिन्छौ ।’ ‘मनसुनजन्य विपद्का कारण घरमा क्षति पुगेका परिवारका लागि पुनःनिर्माण गर्न सहयोग सम्बन्धी कार्यविधि’ अनुसार घर पुनःनिर्माणका लागि हिमाली जिल्लामा पाँच लाख, पहाडमा चार लाख र तराईमा तीन लाख रुपैयाँ प्रति घर दिइने भनिएको छ ।