चितवनमा बस र स्कुटर एकआपसमा ठक्कर खाँदा एकै परिवारका तीन जनाको मृत्यु

चितवन,१४ चैत ।  चितवनको भरतपुर महानगरपालिका २२ पकौडीमा बस र स्कुटर ठक्कर खाँदा ३ जनाको मृत्यु भएको छ। मृत्यु हुने तिनै जना एक परिवारका हुन् ।

आज (शनिबार) साँझ ६:२० बजे भरतपुर-माडी-ठोरी चल्ने भित्री सडक खण्डको पकौडीमा जगतपुरबाट भरतपुरतर्फ आउदै गरेको ना ५ ख २१५० नम्बरको यात्रुबाहक बस र बिपरीत दिशाबाट जाँदै गरेको ना ४० प ७०८२ नम्बरको स्कुटर एक आपसमा ठक्कर खाएको हो ।

दुर्घटनामा परी स्कुटर चालक भरतपुर ६ गीतानगरका ४०/४५ वर्षीय मोहन अधिकारी, उनकी छोरी १७ वर्षीया बिनिशा अधिकारी र चालकको दाईको छोरी १७ वर्षीया दिविशा अधिकारीको मृत्‍यु भएको जिल्ला प्रहरी कार्यालय चितवनले जनाएको छ ।

गम्भीर घाइते भएका तिनै जनाको भरतपुर अस्पतालमा उपचारका क्रममा मृत्‍यु भएको हो । ठक्कर दिने बस चालक प्रहरीको नियन्त्रणमा रहेको छ ।