चुम्लिङटारमा बस र ट्याङ्कर जुध्दा १८ घाइते

मुग्लिन । पृथ्वी राजमार्गको चुम्लिङटारमा यात्रुबाहक बस र ट्याङकर जुध्दा १८ जना घाइते भएका छन् । काठमाडौँबाट मुग्लिनतर्फ आउँदै गरेको ना १ क ६४११ नं को ट्याङकर र गोरखाबाट काठमाडौँ जाँदै गरेको ना ४ ख १४०४७ नं को बस पृथ्वीराजमार्गको इच्छाकामना–३ चुम्लिङटारमा आज बिहान साढे ११ बजे एकआपसमा ठोक्किँदा बसमा सवार १८ घाइते भएका हुन् ।

घाइतेमध्ये चारको अवस्था गम्भीर रहेको इलाका प्रहरी कार्यालय, मुग्लिनले जनाएको छ । घाइतेमध्ये छ जनालाई कुरिनघाटस्थित पोलिक्लिनकमा सामान्य उपचारपछि थप उपचारका लागि भरतपुर लगिएको र अन्यको सोही पोलिक्लिनिकमा उपचार भइरहेको प्रहरीले जनाएको छ । बस र ट्याङ्कर चालकलाई प्रहरीले नियन्त्रणमा लिएको छ ।