अनेरास्ववियु क्रान्तिकारीको भरतपुर महानगर कमिटिले शैक्षिक वातावरणमा खलल पुर्‍याउने कार्य आफ्नो संस्थाले नगरेको स्पष्ट

भरतपुर,चैत्र ६। अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु क्रान्तिकारी)को भरतपुर महानगर कमिटिले शैक्षिक वातावरणमा खलल पुर्‍याउने कार्य आफ्नो संस्थाले नगरेको स्पष्ट पारेको छ ।

उसले बुधबार एक प्रेस विज्ञप्ति जारी गर्दै परीक्षाको तयारी गरिरहेका विद्यार्थीलाई बाधा पुग्ने खालको कुनै पनि कार्य आफ्नो संस्थाबाट नभएको जानकारी गराएको हो । राष्ट्रिय परीक्षा बोर्डले कक्षा १२ को परीक्षा मिति सार्वजनिक गरेको अवस्थामा विद्यालयहरूलाई चाँडोभन्दा चाँडो पाठ्यक्रम पूरा गर्न आग्रह गर्दै आफूहरूले हाल कुनै पनि विद्यालयमा तालाबन्दी नगरेको उसले प्रष्ट पारेको छ ।

महानगरका शैक्षिक संस्थाले लकडाउन अवधिको समेत शूल्क असुलेको अवस्थामा पटकपटक खबरदारी गर्दै महानगरपालिकाको शैक्षिक प्रशासन महाशाखासँग छलफल गरी शूल्क समायोजनको काममा पनि सहजीकरण गरेको उसको भनाइ रहेको छ ।