पार्टीले कुनै भेला आयोजना गरेको छैन : नेकपा एमाले

काठमाडौं ३ फागुन । नेपाल कम्युनिष्ट पार्टी (एमाले) ले चैत ४ र ५ गते पार्टीले कुनै भेला आयोजना नगरेको जनाएको छ । एमालेको नाममा राष्ट्रिय भेला आयोजना गर्ने भनि प्रचारिक समाचार सत्य नभएको पार्टीले जनाएको छ ।

पार्टी महासचिव ईश्वर पोखरेलले आज एक विज्ञप्ति प्रकाशित गरी केही व्यक्तिहरुले सूचना प्रचारित गरिएको भन्दै त्यसमा आफ्नो ध्यानाकर्षण भएको उल्लेख गर्नुभएको छ ।महासचिव पोखरेलद्वारा आज जारी विज्ञप्तिमा भनिएको छ, “यस्ता अनिाधिकृत गुटगत भेला नगर्न–नगराउन, भेला आयोजनाको भ्रम नफैलाउन र कसैले बोलाएमा पनि त्यस्तो अनुशासनहीन गुटगत भेलामा सहभागी नहुन नेकपा एमाले सबै नेता–कार्यकर्ताहरुलाई विशेष निर्देशन गर्दछ ।”

भेलामा सहभागी हुनेहरुलाई कारवाही हुन सक्ने संकेत पोखरेलले गर्नुभएको छ । विज्ञप्तिमा उल्लेख छ “अन्यथा मुलुकको संविधान, पार्टी र संसदीय दलको विधानको व्यवस्था एवं नियमावली बमोजिम हुने कुरा स्पष्ट गरिन्छ ।” नेकपा एमालेको माधव नेपाल समूहले भोली राजधानीमा आफ्नो गुट भेला बोलाएको छ । प्रधानमन्त्री तथा पार्टी अध्यक्ष केपी शर्मा ओलीले पनि सो गूट भेलामा जानेहरुलाई कारवाही हुन सक्ने बताईसक्नु भएको छ ।