अवरुद्ध पृथ्वी राजमार्गमा लेदो माटो हटाएर यातायात सञ्चालन

चितवन । पृथ्वी राजमार्गको मौवाखोला नजिकै पर्ने जवाङ खोलामा भारी वर्षासँगै खसेको लेदो माटो हटाएर यातायात सञ्चालन गरिएको छ । विहान साढे ३ बजेदेखि अवरुद्ध यातायात सडकमा खसेको लेदो माटो पन्छाएर सवा आठ बजेदेखि सञ्चालनमा ल्याइएको जिल्ला प्रहरी कार्यालय, चितवनले जानकारी दिएको छ ।

पृथ्वी राजमार्गको मुग्लिन नौबिसे सडकखण्डको जवाङखोलामा आज बिहान सडकमाथिबाट खसेको लेदोमाटोले सडक अवरुद्ध हुँदा सयौँ सवारी साधन रोकिएका थिए । चितवन र धादिङको सिमानामा पर्ने जवाङखोलामा वर्षा भएपछि लेदोमाटो खस्ने गरेको छ । जिल्ला प्रहरी कार्यालय, चितवनले दिएको जानकारीअनुसार बिहान साढे ३ बजे पहिरो खसेको थियो । डोजरको सहायताले पहिरो पन्छाउने काम गरिएको प्रहरीले जनाएको छ । सडक अबरुद्ध भएपछि सयौँ सवारीसाधन जाममा परेका कारण हजारौँ यात्रु अलपत्र परेका थिए ।

राजमार्ग अवरुद्ध भएपछि सवारी साधनको ४/५ किलोमिटर लामो जाम परेको थियो । दुईतर्फी सवारी साधन चलेका भएपनि लामो जाम भएका कारण ती सवारीका साधन पार हुन केही समय लाग्ने प्रहरीले जनाएको छ ।

(तस्विर सौजन्य : पत्रकार दानबहादुर गुरुङ)

थप तस्विरहरु :