प्रधानमन्त्री बन्ने अवस्था आए भाग्दैन : सभापति देउवा

चितवन, १९ फागुन । नेपाली काङ्ग्रेसका सभापति शेरवहादुर देउवाले प्रधानमन्त्री बन्नुपर्ने अवस्था आए कांग्रेस नभाग्ने बताउनु भएको छ । नेपाली कांग्रेसका नेता एकनाथ रानाभाटको १० औदिनको पुण्यतिथिको अवसरमा नेपाली कांग्रेस चितवनले आज बुधबार रत्ननगरमा आयोजित शोक सभामा बोल्नुहुँदै उहाँले जिम्मेवारीबाट कांग्रेस नभाग्ने बताउनु भएको हो ।

सभापति देउवाले भन्नुभयो “कांग्रेसले पदको लोभ पनि गरेको छैन । टाउकोमा आयो भने भाग्ने पनि छैन ।” उहाँले अगाडि भन्नुभयो “प्रधानमन्त्री पाउँ पनि भनेको छैन । आयो भने भाग्नेवाला पनि छैन ।”

आफु प्रधानमन्त्री भएमा पार्टीलाई फाइदै हुने भन्दै उहाँले भन्नुभयो “पार्टीकै मान्छे प्रधानमन्त्री भयो भने अरुको भन्दा आफ्नै पार्टीकालाई फाइदा होला ।” सोही कार्यक्रममा बरिष्ठ नेता रामचन्द्र पौडेलले कांग्रेसले प्रतिपक्षको भूमिकाको जिम्मेवारी पूर्वक निर्वाह गर्नुपर्ने बताए पछि देउवाले थप्नुभयो “तपाई शेरवहादुर जी हुनै हुँदैन भन्ने चाहानुहुन्न जस्तो लाग्छ । मलाई तपाईको भनाइबाट त्यही बुझियो ।” पौडेललाई सानो चित्त नगर्न र बिशाल हृदय राख्न आग्रह गर्दै देउवाले अबको राजनीतिमा जे आउँछ त्यो बेहोर्दै जानुपर्ने बताउनुभयो । उहाँले रानाभाटको राजनैतिक संघर्षको चर्चा गर्दै एक पटक मन्त्री बनाउने आफ्नो चाहाना पूरा नभएको बताउनुभयो ।