कांग्रेस हैसियत अनुसार प्रतिपक्षमा बस्नुपर्छ : पौडेल

चितवन, १९ फागुन । नेपाली कांग्रेसका वरिष्ठ नेता रामचन्द्र पौडेलले नेपाली कांग्रेस जुन हैसियतमा संसदमा छ त्यसै अनुसार अघि वढ्नुपर्ने बताउनु भएको छ । नेपाली कांग्रेसका नेता एकनाथ रानाभाटको १० औदिनको पुण्यतिथिको अवसरमा नेपाली कांग्रेस चितवनले आज बुधबार रत्ननगरमा आयोजित शोक सभामा बोल्नुहुँदै उहाँले बिपक्षी दलको सही भूमिका नेपाली कांग्रेसले निर्वाह गर्नुपर्ने बताउनु भएको हो ।

सानो संख्यामा संसदमा भए पनि काङ्ग्रेसको भूमिका ठूलो र जिम्मेवारी पूर्ण रहेको भन्दै उहाँले भन्नुभयो “कांग्रेसले सजग र इमान्दार भएर प्रतिपक्षीको भूमिका निर्वाह गर्न सके अर्कोपटक लोकतन्त्रको रक्षा गर्न सक्ने गरी संसदमा बलियो पार्टी बन्ने छ ।”

आम नेपालीले भरोसा गर्ने ठाउँ भनेको कांग्रेस मात्र रहेको भन्दै उहाँले भन्नुभयो “कांग्रेसले त्यही अनुसारको आचरण र व्यवहार देखाउनु पर्छ ।” बिकृतिबाट लोकतन्त्रलाई बचाउनु पर्ने भन्दै पौडेलले भन्नुभयो “बास्तबमा कसैले आफ्नो हैसियत र औकात भन्दा बढी आकंक्षा राख्नु महत्वकांक्षा हो र यो विकृति हो ।”

सो अवसरमा नेपाली काङ्ग्रेसका महामन्त्री डा. शशांक कोइरालाले नेपालको लोकतन्त्र स्थापनामा रानाभाटले पु¥याएको योगदान सह्रानीय रहेको बताउनुभयो । कार्यक्रममा पूर्ब सभामुख तारानाथ रानाभाट, नेपाली कांग्रेसकी केन्द्रीय सदस्य महालक्ष्मी उपाध्याय (डिना), गण्डकी प्रदेशका प्रतिपक्षी दलका नेता कृष्णचन्द्र नेपाली, वागमती प्रदेशका प्रतिपक्षी दलका नेता इन्द्र बानिया, नेपाली कांग्रेस चितवनका सभापति जीतनारायण श्रेष्ठ, नेपाली काङ्ग्रेस नवलपरासीका सभापति बिष्णु सापकोटा र नेपाली काङ्ग्रेस रत्ननगरका सभापति रुपनराज घिमिरेले रानाभाटको राजनैतिक भूमिकाको बारेमा चर्चा गर्नु भएको थियो । नेता रानाभाटको फागुन १० गते ६६ वर्षको उमेरमा उपचारका क्रममा चितवन मेडिकल कलेजमा निधन भएको थियो । उहाँ प्रतिनिधि सभाका पूर्ब सांसद हुनुहुन्थ्यो ।