मेरा चार विषयहरु सभापति शेरबहादुर देउवाले सुन्नुभएन:कांग्रेस बरिष्ठ नेता पौडेल

सुनसरी,९ फागुन । नेपाली कांग्रेसका वरिष्ठ नेता रामचन्द्र पौडेलले आफ्ना चार विषय सभापति शेरबहादुर देउवाले नसुनेको बताएका छन्। ती विषयमाथि हालैको केन्द्रीय समिति बैठकमा आफूले निर्णय गर्नुपर्ने प्रस्ताव गरे पनि सभापति देउवाले ध्यान नदिएको उनले बताए।

आइतबार बिहान सुनसरीमा पत्रकारहरूसँग कुराकानी गर्दै पौडेलले भने, ‘मेरा कुरामा छलफल भएन। पारित गर्ने कुरामा सभापतिले ध्यान दिनुभएन। केन्द्रीय समितिले प्रष्ट दिशा र लाइन नलिँदा देशमा अन्यौलको सिर्जना भयो, म दु:ख व्यक्त गर्छु।’

प्रधानमन्त्री केपी शर्मा ओलीले पुस ५ मा प्रतिनिधि सभा विघटन गरेको कदमलाई कांग्रेसले असंवैधानिक र अलोकतान्त्रिक भनेर ठहर गरेकोले त्यसलाई लोकतान्त्रिक र संवैधानिक बनाउने बाटोतर्फ जानुपर्नेमा केन्द्रीय समितिले यसबारे ठोस निर्णय नगरेकोमा पौडेलको गुनासो छ।

यस्तै संवैधानिक नियुक्तिहरू खारेज गर्न पार्टीले माग गर्नुपर्ने भनेर केन्द्रीय समितिमा कुरा राखे पनि कुनै निर्णय नभएको उनले बताए।