पूर्व माओवादीबाट मेयर बनेका बराल ओली पक्षमा, भने– प्रचण्ड पक्षले पेलेपछिको विस्फोट

सुर्खेत, ४ फागुन । माओवादीको आधार क्षेत्र मानिएको कालिकोटबाट निर्वाचित पूर्वमाओवादी पक्षका एकजना मेयर तथा प्रभावशाली जिल्ला नेता काशीचन्द्र बरालले प्रचण्ड पक्षसँगको सम्बन्ध तोडेका छन् । कर्णालीका मुख्यमन्त्री महेन्द्रबहादुर शाहीको गृहजिल्ला कालिकोटको रास्कोट नगरपालिकाका मेयर बराल केपी ओली नेतृत्वको नेकपामा प्रवेश गर्ने निश्चित भएको हो ।

हाल काठमाडौंमा नेताहरुसँग निरन्तर छलफलकै क्रममा रहेका मेयर बरालले कहिले ओली पक्षमा प्रवेश गर्ने टुंगो नलागेको बताउनुभयो । “मैले टिम बदलेको सत्य हो । कहिले घोषणा हुन्छ भन्ने कुरा अहिले निक्र्योल भइसकेको छैन । केही दिनमा औपचारिक रुपमा म ओली पक्षमा समुहमा लागेको घोषणा गर्छु” उहाँले भन्नुभयो ।

प्रचण्ड पक्षले राजनीतिक संस्कार खत्तम बनाएपछि त्यही समूहमा रहेर काम गर्न सक्ने वातावरण नभएको बताउँदै उहाँले भन्नुभयो “अति पेलेपछि विस्फोट हुने रहेछ ।”