चुनाव हुँदैन, प्रष्ट भए हुन्छ : दाहाल (भिडियोसहित)

भरतपुर, ३ फागुन । नेपाल कम्युनिष्ट पार्टी (नेकपा) प्रचण्ड–दाहालका अध्यक्ष पुष्पकमल दाहालले चुनाव नहुने प्रष्ट भएको बताउनु भएको छ । भरतपुर विमानस्थलमा आज सोमबार पत्रकारहरुसँग कुराकानी गर्दै उहाँले चुनाव नहुने प्रष्ट भईसकेको बताउनु भएको हो ।

आफ्नो सम्धी नरबहादुर केसीलाई श्रद्धाञ्जली दिन यहाँ आउनु भएका दाहालले लामो बलिदान र संघर्षबाट प्राप्त उपलब्धी अहिले धरापमा रहेको बताउनुभयो । उहाँले अगाडि भन्नुभयो “हामी सबै मिलेर यसलाई परास्त गर्नुपर्छ ।” आम नेपाली जनता र राम्रो दिमाग भएको मान्छे केपी ओलिको कदमको विरुद्धमा रहेको उहाँको दावी थियो । उहाँले अगाडि भन्नुभयो “यो कदम राष्ट्र, जनता र लोकतन्त्रको हितमा छैन ।”

संविधान मिचिएको र लोकतन्त्रमाथिनै प्रहार भएकाले त्यसका विरुद्ध आफूहरु आन्दोलनमा रहेको भन्दै उहाँले भन्नुभयो “पञ्च¥याली जम्मा गर्ने, जमिन बाढ्छौं भनेर मान्छे उतार्ने पहिले पहिले राजा महाराजाहरुले गर्थे, अहिले प्रधानमन्त्रीले गर्नुभएको छ । त्यसको कुनै अर्थ छैन ।”

प्रधानमन्त्री केपी ओलिलाई लक्षित गर्दै उहाँले भन्नुभयो “उहाँले जतिबेला प्रतिगमन र प्रतिगमनको बाटो पक्रिनु भयो, उहाँले हारिसक्नु भएको छ । मतमा पनि हार्नुहुन्छ ।” व्यवहारिक रुपमा पनि हारिसकेको दाहालको दावी थियो ।