आज काँग्रेस चितवनद्वारा संसद विघटनविरुद्ध विरोध सभा गर्दै,पूर्व स्वास्थ्य मन्त्री गगन थापाले सम्बोधन गर्ने

चितवन, ३ फागुन । नेपाली काँग्रेसले आज (सोमबार) देशभर सरकारको विरोधमा प्रदर्शन गर्दैछ । केपी शर्मा ओलीले गरेको प्रतिनिधि सभा विघटनको विरोधमा काँग्रेसले देशभर प्रदर्शन गर्न लागेको हो ।

काँग्रेस चितवनले पनि आज दिउँसो १ बजेभरतपुरको चबिसकोठीमा संसद विघटनविरुद्ध विरोध सभा गर्दैछ । सभालाई पूर्व स्वास्थ्य मन्त्री एवं नेपाली काँग्रेसका केन्द्रीय सदस्य गगनकुमार थापाले प्रमुख वक्ताको रुपमा सम्बोधन गर्ने कार्यक्रम रहेको छ । यस्तै सभालाई काँग्रेसकी केन्द्रीय सदस्य सरिता प्रसाइले पनि सम्बोधन गर्ने जिल्ला सभापति जितनारायण श्रेष्ठले जानकारी दिए ।

त्यस अघी दिउँसो सवा १२ बजे केन्द्रीय बस टर्मिनल (पारस बसपार्क) बाट विरोध र्‍याली निकालिनेछ । केन्द्रीय बस टर्मिनलबाट निकालिने र्‍याली जिल्ला प्रशासन कार्यालयचोक-मालपोतचोक- जिल्ला प्रहरी कार्यालय हुँदै चौबिसकोटीमा पुगेर सभामा परिणत हुनेछ ।

काँग्रेस चितवनमा सचिव उत्तम जोशीले प्रदर्शनको सम्पूर्ण तयारी पुरा भएको जानकारी दिए । जोशीका अनुसार कार्यक्रमको प्रचार प्रसारदेखि कार्यकर्ताहरुलाई पत्र पठाएर निम्तो गर्नेलगायतका सम्पूर्ण तयारी पुरा भएको छ । बिरोध सभामा सहभागी हुनका लागि ४० हजार जनालाई पत्र पठाएर निम्तो गरिएको छ । काँग्रेसले जिल्लाका सात वटा स्थानीय तहका ९८ वटा वडा समिति मार्फत घरघरमा पत्र पठाएको हो ।

कार्यक्रममा हजारौंको संख्यामा नेता कार्यकर्ताहरुको सहभागीता रहने उनले बताए । कार्यक्रमलाई संयमित र मर्यादित बनाउने जोशीको भनाइ छ । प्रतिनिधि सभा विघटनको विरोधमा काँग्रेसले केन्द्रीय समितिको निर्णय अनुसार चरणवद्ध रुपमा विरोध प्रदर्शन गरिरहेको छ । काँग्रेसले वडा, पालिका, प्रदेश क्षेत्र, संघिय क्षेत्र हुँदै जिल्ला तहमा बिरोध कार्यक्रम गर्न लागेको हो ।