क्रिकेट रङ्गशालाको बार भत्काउने कँडेल र बस्ताकोटीलाई नेकपाको कारवाही, पार्टीबाटै निलम्बन

चितवन । गौतमबुद्ध अन्तर्राष्ट्रिय क्रिकेट रङ्गशालाको बारमा डोजर लगाई भत्काउने कार्यमा संलग्न भएको ठहर गर्दै नेपाल कम्युनिष्ट पार्टी (नेकपा), चितवनले दुई कार्यकर्तालाई सदस्यबाट निलम्बन गरेको छ । नेकपाले भरतपुर–१६ निवासी प्रकाश कँडेल घटनाका मुख्य नाइके रहेका पनि उल्लेख गरेको छ ।

नेकपा चितवनका अध्यक्ष यमबहादुर परियार ‘इन्द्रजीत’ले आज प्रेस विज्ञप्ति जारी गरी प्रकाश कँडेललाई सदस्यताबाट निलम्बन गरेको र अर्का पार्टी सदस्य भैरब बस्ताकोटीलाई दुई महिनाका लागि पार्टी सदस्यबाट निलम्बन गरेको जनाउनु भएको छ । उनीहरु दुवैजनालाई प्रहरीले पक्राउ गरेको छ ।

विज्ञप्तिमा गौतमबुद्ध अन्तर्राष्ट्रिय क्रिकेट रङ्गशालाको बार उद्दण्ड व्यक्तिहरुले डोजर लगाई भत्काएको घटनाप्रति पार्टीको गम्भीर ध्यानाकर्षण भएको उल्लेख गर्दै दोषी उपर कानुनी कारवाही अगाडि बढाई क्षतिपूर्ति भराउनसमेत सरकारसँग माग गरिएको छ । विज्ञप्तिमा रङ्गशाला निर्माण कार्यको संयोजन गरिरहेको धुर्मुस–सुन्तली फाउण्डेसनलाई यस्ता घटनाबाट विचलित नहुन आग्रह गर्दै साथ र सहयोगका लागि पार्टी हरदम तयार रहेको प्रतिबद्धता पनि जनाइएको छ ।