गणतन्त्र दिवसको अवसरमा चितवनमा प्रभातफेरी कार्यक्रम सम्पन्न

चितवन । गणतन्त्र दिवसको अवसरमा आज चितवनमा प्रभातफेरी कार्यक्रम सम्पन्न भएको छ । गणतन्त्र दिवस मूल समारोह समिति, चितवनले आयोजना गरेको प्रभातफेरीमा जनप्रतिनिधि, राजनीतिक दलका नेता, कर्मचारी, विभिन्न पेशा व्यवसायी, समाजसेवीलगायत सर्वसाधारणको सहभागिता थियो ।

भरतपुरको चौबीसकोठीबाट गेष्टहाउस चौरसम्म प्रभातफेरी गरिएको थियो । प्रभातफेरीपछि भएको कार्यक्रममा वक्ताहरुले गणतन्त्र संस्थागतसँगै मुलुक समृृद्धितर्फ अघि बढेको बताएका छन् । उनीहरुले समृद्धिका लागि सबै एक हुनुपर्नेमा पनि जोड दिए ।

प्रदेशसभा सदस्य घनश्याम दाहाल र विजय सुवेदीले सरकार समृद्धिको यात्रामा लागेको भन्दै विकासमा पक्ष र विपक्ष हुन नहुने बताउनुभयो । भरतपुर महानगरपालिका प्रमुख रेनु दाहाल, नेपाल कम्युनिष्ट पार्टी (नेकपा) चितवनका अध्यक्ष यमबहादुर परियार र नेपाली काङ्ग्रेस चितवनका सभापति जीतनारायण श्रेष्ठले गणतन्त्र संस्थागत हुनका लागि देशमा समृद्धि आवश्यक रहेको भन्दै सरकार त्यसतर्फ लाग्नुपर्नेमा जोड दिनुभयो ।

समारोहमा प्रमुख जिल्ला अधिकारी जितेन्द्र बस्नेतले सबै राष्ट्रसेवकहरुले इमान्दारीपूर्वक काम गरेर जनतालाई गणतन्त्रको आभास दिलाउनुपर्ने बताउनुभयो । कार्यक्रम जिल्ला समन्वय समिति चितवनका प्रमुख कृष्णकुमार डल्लाकोटीको अध्यक्षतामा भएको थियो ।