राजकुमार चेपाङ मृत्यु प्रकरणमा सेनाका हुद्दा पूर्पक्षका लागि थुनामा

भरतपुर । चितवन राष्ट्रिय निकुञ्जमा राजकुमार चेपाङलाई कुटपिट पछि मृत्यु भएको घटनामा सेनाका हुद्दा चिरणबहादुर बुढालाई पुर्पक्षका लागि थुनामा राख्ने आदेश भएको छ । जिल्ला अदालत चितवनले मंगलबार उक्त आदेश गरेको हो । अदालतका श्रेस्तेदार ईश्वर आचार्यका अनुसार जिल्ला न्यायाधिश गायत्रीप्रसाद रेग्मीको एकल ईजलासले उक्त आदेश गरेको हो ।

राप्ती नगरपालिका वडा नं. २ का २४ वर्षिय राजकुमार चेपाङको साउन १ गते कुटपिटपछि गत साउन ८ गते मृत्यु भएको थियो । घटनामा संलग्न रहेको आरोपमा सेनाका हुद्दा बुढालाई भदौ ४ गते प्रहरीले पक्राउ गरी मुद्दा अघि बढाएको थियो । सेनाको कुटाईपछि बिरामी भएका राजकुमारको स्थानीय मेडिकलमा उपचार हुन नसकेपछि भरतपुर अस्पताल ल्याईएको थियो । उनको उपचारको क्रममा साउन ८ गते मृत्यु भएको हो ।