निषेधाज्ञा हटेसँगै चितवनमा कोरोना संक्रमित बढ्दै, एकैदिन ८४ जनामा संक्रमण पुष्टि

चितवन । जिल्लामा निषेधाज्ञा हटेसँगै संक्रमितको संख्या पनि बढ्दै गएको छ । यहाँका दुई वटा ल्याबमा बुधबार गरिएका स्वाब परीक्षणमा एकै दिन ८४ जनामा कोरोना संक्रमण पुष्टि भएको हो । बुधबार भरतपुर अस्पताल कोभिड १९ प्रयोगशालामा २३ र चितवन मेडिकल कलेजको प्रयोगशालामा गरिएको स्वाब परीक्षणमा ६१ जना गरी ८४ जनामा संक्रमण पुष्टि भएको छ।

भरतपुर अस्पताल कोभिड १९ प्रयोगशालामा गरिएको परीक्षणमा चितवनका २२ जनासहित २३ जनामा संक्रमण पुष्टि भएको छ । जसमा भरतपुर महानगरपालिकाका ४ पुरुष र ३ महिला गरी ७ जना, राप्ती नगरपालिका–६ का ३ पुरुष र एक महिला गरी चार जना, खैरहनी नगरपालिका–५ र ६ का २ पुरुष र ३ महिला गरी ५ जना र रत्ननगर नगरपालिकाका विभिन्न वडाका २ पुरुष र ४ महिला गरी ६ जनामा संक्रमण पुष्टि भएको छ । नवलपरासीको कावासोती नगरपालिका–३ का १ महिलामा संक्रमण पुष्टि भएको प्रयोगशालाका प्रमुख डा. नितु अधिकारीले जानकारी दिनुभयो ।

यस्तै चितवन मेडिकल कलेजमा गरिएको परीक्षणमा चितवनका ५२ जना र ९ जना विभिन्न जिल्लाका छन् । चितवनका संक्रमण पुष्टि हुनेमा भरतपुर महानगरपालिकाका ४३ जना रहेका छन् । यस्तै रत्ननगर नगरपालिकाका ५ जना, खैरहनी नगरपालिका २ जना, राप्ती र माडी नगरपालिकाका एक÷एक जना रहेका छन् ।

यसैगरी तनहुँका २, नवलपुर गैंडाकोटका २ जना, कैलालीका २ जना र लमजुङ, बारा, मकवानपुरका एक÷एक जनामा संक्रमण पुष्टि भएको छ । सर्वसाधारणले सरकारले जारी गरेको स्वास्थ्य मापदण्ड पालना नगर्दा संक्रमित थपिंदै गएका हुन् ।