दासढुङ्गामा मदन–आश्रितप्रति चढाइए श्रद्धाका फूल, ‘नेता कार्यकर्तामा त्यागको आवश्यकता’

चितवन । २६औँ मदन–आश्रित स्मृति दिवसको अवसरमा नेपाल कम्युनिष्ट पार्टी (नेकपा) चितवनले शुक्रबार दासढुङ्गामा श्रद्धाञ्जलि सभा सम्पन्न गरेको छ । कार्यक्रममा नेकपाका केन्द्रीय सदस्य काशिनाथ अधिकारीले जननेता मदन भण्डारीले परम्पराको शिलशिलालाई तोडेर जनताको बहुदलीय जनवादको सिर्जनात्मक प्रयोगबाट नयाँ ढङ्गले पार्टीलाई अगाडि बढाउनुभएको उल्लेख गर्नुभयो । सामाजिक, साँस्कृतिक क्रान्तिमार्फत साँचो अर्थमा समाजवाद प्राप्त गर्न सकिने उल्लेख गर्दै उहाँले त्यसकालागि नेता, कार्यकर्तामा त्याग र समर्पणको आवश्यकता रहेको धारणा राख्नुभयो ।

कार्यक्रममा नेकपाका केन्द्रीय सदस्य देवी ज्ञवाली, कृष्णप्रसाद खनाल, भूमि व्यवस्था तथा सहकारी मन्त्री दावादोर्जे लामा, प्रदेश सभासद घनश्याम दाहाललगायतका नेताहरुले देशी विदेशी षडयन्त्रबाट मदन–आश्रितको हत्या भएको उल्लेख गर्नुभयो । उहाँहरुले कार्यकर्ताको चाहनाअनुसार सिङ्गो कम्युनिष्ट पार्टी निर्माण भएको र दुई तिहाईको सरकार पनि बनेकोले अब समृद्धिको यात्राबाट समाजवादसम्म पुग्नुपर्ने विचार व्यक्त गर्नुभयो ।

नेकपा चितवनका अध्यक्ष यामबहादुर परियार ‘इन्द्रजीत’को अध्यक्षतामा भएको उक्त कार्यक्रमको सञ्चालन पार्टीका जिल्ला सचिव कृष्णभक्त पोखरेलले गर्नुभएको थियो । त्यस अवसरमा दिवङ्गत नेताद्वय मदन–आश्रितको शालिकमा नेकपाका नेता, कार्यकर्ताहरुले माल्यार्पण एवम् पुष्पगुच्छा अर्पण गर्नुकासाथै उहाँहरुको सम्झनामा एक मिनेट मौन धारण पनि गरिएको थियो ।

मदन–आश्रित चढेको जीप यहीँबाट त्रिशुली नदीमा खसेको थियो । तस्वीर : न्यूजभित्तो

तत्कालीन नेकपा एमालेका महासचिव जननेता मदनकुमार भण्डारी र संगठन विभाग प्रमुख कुशल संगठक जीवराज आश्रितको २०५० साल जेठ ३ गते चितवनको नारायणगढ–मुग्लिन सडकको दासढुङ्गास्थित त्रिशुली नदीमा रहश्यमयी जीप दुर्घटनामा निधन भएको थियो । मदन भण्डारीद्वारा प्रतिपादित सिद्धान्त जनताको बहुदलीय जनवाद (जबज)लाई अङ्गीकार गरेको एमाले पछिल्लो निर्वाचनसम्म आईपुग्दा देशकै पहिलो पार्टी बन्न सफल भएको थियो ।