काठमाण्डौंबाट सर्लाही हिँडेको एम्बुलेन्स त्रिशुली नदीमा खस्यो, चालकसहित पाँच जना घाइते

चितवन । काठमाण्डौंबाट सर्लाहीतर्फ जाँदै गरेको एम्बुलेन्स इच्छाकामना गाउँपालिका वडा नं. ३ स्थित पृथ्वीराजमार्गबाट त्रिशुली नदीमा खसेको छ । घटनामा पाँच जना घाइते भएका हुन् । मंगलबार बिहान ५ः१५ बजेको समयमा पानीधारा भन्ने स्थानबाट त्रिशुली नदीमा एम्बुलेन्स खस्दा सर्लाहीका चार जना र झापाका एक जना घाइते भएको प्रहरीले जनाएको छ ।

ना ५ च १०३३ नम्बरको एम्बुलेन्स आफै अनियन्त्रित भई सडकबाट ५० मिटर तल त्रिशुली नदीको किनारमा खसेको हो । घाइते हुनेमा एम्बुलेन्स चालक झापा गौरीगन्ज गाउँपालिका वडा नं. १ बस्ने वर्ष २८ का सरोज दाहाल, क्यान्सरका बिरामी सर्लाही बरहथवा नगरपालिका वडा नं. २ बस्ने वर्ष ५० की दिल माया राना मगर, सोही स्थानकी वर्ष १५ की बाधे राना मगर, वर्ष २६ की मेक कुमारी राना मगर, वर्ष ३४ को नरबहादुर मगर रहेका छन् ।

उनीहरु मध्ये एक जनाको अवस्था गम्भीर र चार जनाको अवस्था मध्यम रहेको प्रहरीले जनाएको छ । उनीहरुको भरतपुरमा उपचार भईरहेको छ ।