चितवनमा कोरोना संक्रमितको संख्या थपिंदै, मृतक संख्या १२ पुग्यो

चितवन । जिल्लामा कोरोना संक्रमणबाट थप एक जनाको मृत्यु भएको छ । चितवन मेडिकल कलेज भरतपुरमा उपचाररत भरतपुर महानगरपालिका वडा नं. ११ निवासी ५२ वर्षिय पुरुषको उपचारको क्रममा आईतबार मध्यान्ह १२ बजे मृत्यु भएको हो ।

अस्पतालका निर्देशक डा. दयाराम लम्सालका अनुसार उनी निमोनियाका बिरामी थिए । भदौ ४ गते अस्पतालमा भर्ना भएका उनलाई ७ गते कोरोना संक्रमण पुष्टि भएको थियो । संक्रमण बढ्दै गएर श्यावप्रश्वासमा थप जटिलता आएपछि अस्पतालको भेन्टिलेटरमा राखेर उनको उपचार गरिएको भए पनि बचाउन नसकिएको उहाँले बताउनुभयो ।

अस्पतालमा हाल पाँच जना कोरोना संक्रमित भेन्टिलेटरमा उपचाररत छन् । चितवनमा मृत्यु हुने कोरोना संक्रमितको संख्या यो सहित १२ पुगेको छ । यी मध्ये पाँच जना चितवनका, तीन जना मकवानपुरका ३, गोरखा, कैलाली, पूर्वी नवलपरासी र बाराका एक÷एक जना रहेका छन् ।