संक्रमण बढ्दै गएपछि चितवनमा एक साता निषेधाज्ञा थपियो, माडीमा पनि निषेधाज्ञा

चितवन । जिल्ला प्रशासन कार्यालय चितवनले एक साता निषेधाज्ञा थप गरेको छ । भदौ १२ गतेसम्मका लागि निषेधाज्ञाको अवधि थप गरेको हो । प्रमुख जिल्ला अधिकारी नारायणप्रसाद भट्टराईद्वारा शुक्रबार एक सूचना प्रकाशित गरी निषेधाज्ञाको अवधि एक साता थप गर्ने निर्णय गरिएको उल्लेख छ । यसअघि जिल्लाका ६ वटा स्थानीय तहमा निषेधाज्ञा लागू गरिएकोमा यसपटक माडी नगरपालिकामा समेत निषेधाज्ञा जारी गरिएको सूचनामा जनाईएको छ ।

पहिलोपटक गरिएको एक साताको निषेधाज्ञाको अवधि आज शुक्रबार राति १२ बजेदेखि सकिदै थियो ।

जिल्लामा पछिल्ला दिनहरुमा कोरोना संक्रमितको संख्या बढ्दै गएको छ । अस्पतालमा कार्यरत चिकित्सक तथा स्वास्थ्यकर्मीहरु समेत संक्रमित हुने क्रम जारी रहेको छ । समुदायस्तरमा समेत कोरोना देखिन थालेपछि प्रशासनले निषेधाज्ञा लागू गरेर कोरोना नियन्त्रणको प्रयास जारी राखेको छ ।