चितवनमा थप एक जना कोरोना संक्रमितको मृत्यु, जिल्लामा मृत्यु हुनेको संख्या ४ पुग्यो

भरतपुर । भरतपुर अस्पतालमा उपचाररत एक जना कोरोना संक्रमितको आज बिहीबार मृत्यु भएको छ । मृत्यु हुनेमा रत्ननगर नगरपालिका वडा नं. १३ का ६५ वर्षका पुरुषको रहेको अस्पतालले जनाएको छ ।

अस्पतालका कोभिड १९ क्लिनिकल कोअर्डिनेटर डा.प्रमोद पौडेलका अनुसार विगत ६ दिनदेखि कोभिड १९ संक्रमण भई अस्पतालको कोभिड सघन उपचार कक्षमा उपचाररत पुरुषको दिउँसो २ः५७ बजे मृत्यु भएको हो ।

मृतक पुरुष दीर्घरोगी रहेको र उनमा फोक्सोमा क्षयरोग, स्पाईनल ईन्जुरले खुट्टा नचल्ने, मृगौलामा समस्या लगायतका समस्या रहेको उहाँले जानकारी दिनुभयो ।

उनीसँगै कोरोना संक्रमणका कारण हालसम्म भरतपुर अस्पतालमा तीन जनाको मृत्यु भएको छ । अर्का एक जनाको पूर्वी चितवनमा आफ्नै निवासमा मृत्यु भएको थियो । जिल्लामा कोरोना संक्रमित हुनेको संख्या दिनानुदिन बढ्दै गएको छ ।