भरतपुरका अस्पतालहरुमा कोरोना संक्रमित बढ्दै : भरतपुर अस्पतालका मेसु सहित तीन र क्यान्सर अस्पतालका पाँच जनामा संक्रमण

चितवन । जिल्लाका सरकारी र निजी अस्पतालहरुमा कोरोना भाईरस (कोभिड १९) को संक्रमण बढ्दै गएको छ । अस्पतालमा आउने बिरामीसँगै चिकित्सक र स्वास्थ्यकर्मीहरुमा पनि कोरोना संक्रमण बढ्दै गएको हो ।

शनिबार गरिएको स्वाब परीक्षणमा भरतपुर अस्पतालका प्रमुख मेडिकल सुपरिटेण्डेन्ट डा.श्रीराम तिवारी, प्रसुती विभाग प्रमुख प्रा.डा. सुनिलमणि पोखरेल, आकस्मिक कक्षमा कार्यरत एक चिकित्सक र एक नर्सलाई कोरोना संक्रमण पुष्टि भएको छ । अस्पतालका अध्यक्ष डा.भोजराज अधिकारीका अनुसार उहाँहरुको स्वास्थ्य सामान्य रहेको छ ।

अस्पतालका मेसु डा.तिवारी अहिले अस्पतालकै एउटा क्याबिनमा रहनु भएको छ । डा.तिवारी कोरोना संक्रमितका बिरामीको व्यवस्थापनका लागि अहोरात्र खटिदै आईरहनु भएको छ । अन्य संक्रमित पनि आईसोलेट भईसक्नु भएको अधिकारीले जानकारी दिनुभयो ।
यसैगरी शनिबारै गरिएको स्वाब परीक्षणमा वीपी कोईराला मेमोरियल क्यान्सर अस्पतालका पाँच जना नर्समा संक्रमण देखिएको अस्पतालका निर्देशक डा. देजकुमार गौतमले जानकारी दिनुभयो । होम क्वारेन्टाइनमा बस्न मिल्नेलाई घरमा र नमिल्नेलाई अस्पतालम‌ै बनाइएको आइसोलेसनमा राखिने गौतमले जानकारी दिनुभयो ।