पार्टीका सबै कार्यक्रम रोक्न नेकपा चितवनको निर्देशन

भरतपुर । नेपाल कम्युनिस्ट पार्टी(नेकपा) चितवनले पार्टी मातहतका सबै कार्यक्रमहरु रोक्न निर्देशन दिएको छ । पार्टीले शनिबार एक विज्ञप्ति जारी गर्दै बैठक, भेला लगायतका पार्टीसँग सम्बन्धित सबै कार्यक्रम रोक्न निर्देशन दिएको हो ।

पार्टी मातहतका कमिटी तथा संगठनहरुलाई सो निर्देशन दिएको छ । विज्ञप्तिमा सरकार तथा स्थानीय पालिकाहरुको निर्देशनलाई पूर्ण पालना गरी सुरक्षितरुपमा घरमै बस्न सम्पूर्ण जिल्लावासीहरुमा अग्रह गरिएको छ । यस अवधिमा कुनै पनि भेला, सभालगायतका कार्यक्रमहरु नगर्न पार्टीका मातहत कमिटी तथा जनवर्गीय संगठनहरुमा समेत विज्ञप्तिमार्फत् निर्देशन गरिएको छ ।

पार्टीले चितवन जिल्लामा समेत कोरोना भाइरस कोभिड १९ फैलिँदै गएको र दिनहुँ सक्रमितको संख्या बढ्दै गएको उल्लेख गर्दै यो भाइरसबाट सुरक्षित रहन कुनै पनि भेला, सभा सम्मेलन नगर्न, भीडभाड नगर्न र अत्यावश्यक कामबाहेक घरबाट बाहिर ननिस्कन, बाहिर निस्कनुपर्ने अवस्थामा अनिवार्यरुपमा मास्क लगाउन तथा सामाजिक दूरी कायम गर्न निर्देशन दिएको छ ।