स्वास्थ्यकर्मीलाई संक्रमण भएपछि भरतपुर अस्पतालको ईमर्जेन्सी कक्ष सिल

चितवन । भरतपुर अस्पतालमा कार्यरत एक स्वास्थ्यकर्मीमा कोरोना भाइरस (कोभिड–१९) संक्रमण पुष्टि भएपछि अस्पतालको ईमर्जेन्सी कक्ष सिल गरिएको छ । भरतपुर अस्पताल कोभिड–१९ प्रयोगशालामा आज बिहीबार गरिएको परीक्षणमा भरतपुरकी २५ वर्षीया नर्समा कोरोना संक्रमण पुष्टि भएको हो ।

अस्पतालको इमर्जेन्सी कक्षमा कार्यरत ती नर्समा संक्रमण देखिएको हो । अस्पतालमै कार्यरत नर्समा संक्रमण देखिएपछि इमर्जेन्सी कक्ष सिल गरिएको अस्पतालले एक सूचना प्रकाशित गरी जनाएको छ ।

ती स्वास्थ्यकर्मीको सम्पर्कमा आएका बिरामी र अन्य स्वास्थ्यकर्मीको कन्ट्याक्ट ट्रेसिङ गरी स्वाब परीक्षण गरिने जनाईएको छ । चितवनका अन्य विभिन्न अस्पतालहरुमा रहेका बिरामीमा समेत कोरोना संक्रमण देखिएपछि चितवनमा कोरोनाको जोखिम उच्च रहेको छ ।