जनताको नजरमा बदनाम कर्मचारीलाई नगरपालिकामा छिर्न दिन्न : प्रमुख छत्रराज पौडेल

गैडाकोट । गैडाकोट नगरपालिकाका प्रमुख छत्रराज पौडेलले जनताको नजरमा बदनाम कर्मचारीहरुलाई नगरपालिका छिर्न नदिने बताउनु भएको छ । आज आईतबार गैडाकोटमा विश्व आदिवासी जनजाती दिवसको अवसरमा आयोजित कार्यक्रममा बोल्दै प्रमुख पौडेलले सत्यका लागि पद छाड्न तयार रहेको बताउनु भएको हो ।

आफूले सधैं गलत प्रवृतीको भण्डाफोर गर्ने बताउँदै उहाँले गलत बृत्तिको पछि लागेर जनतामाथि अन्याय गर्न नसक्ने बताउनुभयो । पार्टी भित्र र बाहिर खिचातानी गरेर काममा अवरोध गर्नेहरुलाई जनताले नै सजायँ दिने बताउँदै उहाँले भन्नुभयो “म किसानको छोरा हुँ, बरु गाई भैसी पालेर बस्छु, तर गलत प्रवृतीको ढाकछोप गरेर बस्न सक्दिन ।” आफूले जनताको काममा बाहेक अन्यत्र ध्यान नदिएको बताउँदै उहाँले भन्नुभयो “म सधैं विधिमा चल्ने मान्छे हुँ, कसैको दवाव र प्रभावमा काम गर्न सक्दिन र गर्दिन पनि ।”

पौडेलले काम गर्ने कर्मचारीलाई नगरपालिकामा सधैं स्वागत रहेको भन्दै उहाँले राष्ट्रिय रुपमा बदनाम भएका कर्मचारीलाई नगरमा भित्राउन नचाहेको बताउनुभयो । पौडेलले नगरको हितमा काम गर्ने प्रशासकीय अधिकृत ल्याउनुपर्ने अडान राख्दै आउनु भएको छ । तर पार्टीका जिल्ला र केन्द्र तहका केही नेताले आफु अनुकूलका बद्नाम प्रमुख प्रशासकिय अधिकृत गैंडाकोटमा ल्याउन सिफारिस गरेपछि उहाँ आक्रोशित हुँदै आउनु भएको छ ।