चितवनका दुई सहित ४ जनामा कोरोना संक्रमण पुष्टि, बुधबार कोरोना पुष्टि भएका वृद्धका छोरा र बुहारीमा संक्रमण

चितवन । चितवनका दुई जनासहित चार जनामा कोरोना भाइरस (कोभिड–१९) संक्रमण पुष्टि भएको छ । गत बुधबार कोरोना पुष्टि भएका बृद्धका छोरा र बुहारीमा संक्रमण पुष्टि भएको हो ।

भरतपुर अस्पताल कोभिड–१९ परीक्षण प्रयोगशालामा गरिएको परीक्षणमा चितवनको भरतपुर महानगरपालिका वडा नं. १ का दुई जना, पर्साको वीरगञ्जका एक जना र सर्लाहीका लालबन्दी–११ का एक जना गरी चार जनामा कोरोना संक्रमण पुष्टि भएको हो ।

भरतपुरका कोरोना संक्रमित एक ४६ वर्षीय पुरुष र एक ३८ वर्षीय महिला हुन् । शुक्रबार कुल १३१ नमुनाको परीक्षण गरिएको थियो । बाँकी १२७ वटा नमुनाको रिपोर्ट नेगेटिभ आएको छ ।

यस्तै वीरगञ्ज–१० घर भएकी ४२ वर्षीय कोरोना संक्रमित महिलाको भने चितवन मेडिकल कलेजमा उपचार भइरहेको छ । यस्तै सर्लाहीका ७९ वर्षीय पुरुषको भने वीपी कोइराला मेमोरियल क्यान्सर अस्पताल भरतपुरमा उपचार भइरहेको छ । उनीहरुको हस्पिटलबाटै स्वाब संकलन गरिएको थियो ।

बुधबार कोरोना परीक्षण गर्दा भरतपुर–१ का ७९ वर्षीय पुरुषमा कोरोना संक्रमण पुष्टि भएको थियो । वृद्धमा कोरोना संक्रमण देखिएपछि बिहीबार उनका ४६ वर्षीय छोरा र ३८ वर्षीय बुहारीको स्वाब संकलन गरिएको थियो । शुक्रबार परीक्षण गर्दा छोरा बुहारीमा पनि संक्रमण पुष्टि भएको हो ।

उनीहरुको परिवारमा रहेका दुई नाती र एक जना कामदारको पनि अब कोरोना परीक्षण गर्नु पर्ने भएको छ ।