प्रोफेसनल मिडिया ग्रुपले शुरु ग-यो आफ्नै भवन निर्माणको काम, पाँच वटा मिडिया एउटै छानामुनि रहने

भरतपुर । प्रोफेसनल मिडिया ग्रुपले आफ्नो पाँच वटा मिडियालाई एउटा छानामुनि राख्ने गरी भवन निर्माणको काम शुरु गरेको छ । गलेश्वर आश्रम देवघाटधामका पिठाधिस महामण्डलेश्वर १ हजार ८ स्वामी आत्मानन्द गिरीजी महाराजले बिहीबार भवनको शिलान्यास गर्नुभएको हो ।

सो अवसरमा प्रमुख अतिथि महाराजले पत्रकारहरुले समस्या उठाउने मात्रै नभई समाधानको उपाय पनि दिनु पर्ने बताउनुभयो । पत्रकारहरु समाजका बौद्धिक वर्ग भएको भन्दै उहाँले समाजले पत्रकारबाट ठूलो अपेक्षा राखेको बताउनुभयो । उहाँले सूचना, समाचार, संगीत र मनोरञ्जनको क्षेत्रमा ग्रुप अग्रणी बन्नेमा आफु विश्वस्त रहेको बताउनुभयो । सामाजिक उत्तरदायित्व वहन गर्ने क्रममा व्यवसायिक क्षेत्रबाट पनि मिडियालाई सहयोग गर्न उहाँले आग्रह गर्नुभयो । मिडिया पक्ष विपक्षमा भन्दा पनि सधैं सत्यको पक्षमा लाग्न उहाँले सुझाव दिनुभयो ।

कार्यक्रममा बोल्दै संविधानसभा सदस्य रामकृष्ण घिमिरेले ग्रुप व्यवसायीक बन्ने मा आफू विश्वस्त रहेको बताउनुभयो । एउटै भवनबाट सेवा प्रवाह हुँदा व्यवसायिक सफलतामा पनि सहयोग मिल्ने उहाँको भनाई थियो ।

बागमती प्रदेशका सांसद बिजय सुवेदीले प्रोफेसनल मिडिया ग्रुपको भविष्य उज्वल बनोस् भन्ने कामना गर्दै सफलताको शुभकामना दिनुभयो । ग्रुप आफ्नो यात्रामा अघि बढ्दै गर्दा आवश्यक पर्ने हरेक सहयोग गर्न आफु तयार रहेको सांसद सुवेदीको भनाइ थियो । सुवेदीले सत्य, तथ्य र निश्पक्ष खबर पस्किँदै व्यवसायीक ढंगले अघि बढ्न सुझाब दिनुभयो ।

नेपाली काँग्रेस चितवनका सभापति जीतनारायण श्रेष्ठले जनतालाई सुसूचित गराउने काममा ग्रुप निर्भिक ढंगले अघि बढ्नेमा आफु विश्वस्त रहेको बताउनुभयो । लोकतान्त्रिक प्रणालीलाई बलियो बनाउन मिडियाको भूमिका महत्वपूर्ण हुने भन्दै सभापति श्रेष्ठले कसैको दवाब, धम्की र प्रभावमा नपरी काम गर्न हौसला दिनुभयो ।

सो अवसरमा बोल्दै भरतपुर महानगरपालिकाका उप–प्रमुख पार्वती शाह ठकुरीले ग्रुपलाई महानगरको तर्फबाट आवश्यक सहयोग रहने बताउनुभयो ।

ग्रुपका सल्लाहकार एवं नेपाल प्रेस युनियनका केन्द्रीय बरिष्ठ उपाध्यक्ष कोरोनाका कारण मिडिया असहज अवस्थामा रहे पनि यस ग्रुपले आफ्नै भवन बनाउने साहस गरेकोमा प्रशंसा गर्नुभयो । उहाँले असहज परिस्थितिमा राज्यले मिडियालाई प्याकेजमा राहत दिनुपर्ने बताउँदै तर त्यसका लागि राज्य तयार नरहेको बताउनुभयो ।
कार्यक्रममा पूर्व सांसद जगन्नाथ पौडेल, भरतपुर ५ का वडाध्यक्ष पदमपाणी सुवेदी, ७ का वडाध्यक्ष राजेन्द्रमणी काफ्ले, कांग्रेसका नेता भक्ति तिमिल्सिना लगायतको उपस्थिती थियो ।

भवन शिलान्यासका क्रममा ग्रुपका अध्यक्ष नबिनराज पौडेल र उपस्थित सम्पूर्ण अतिथिले साथ दिनुभएको थियो । भरतपुर–रामपुर सडकखण्डमा पर्ने भरतपुर ४ सृष्टि चोक, ओमशान्ति भवनसंगैको जग्गामा ग्रुपको भवन निर्माण हुन लागेको हो ।

सो अवसरमा महामण्डलेश्वर गुरुसँगै ग्रुपका अध्यक्ष पौडेलका पिता र माता भूमि पूजन गर्नुभएको थियो । निर्माण सम्पन्न भएपछि ग्रुप अन्तर्गतका रेडियो भरतपुर, भरतपुरपोष्ट, भरतपुर टेलिभिजन, सार्थक बिज्ञापन सेवा र बेदान्त मल्टिपरपोज कम्म्पनी एउटै भवनमा रहने छन्।