मध्यवर्ती क्षेत्र व्यवस्थापन समितिको अध्यक्षमा नेकपाका युवा नेता ढुङ्गाना निर्वाचित

चितवन । चितवन राष्ट्रिय निकुञ्ज मध्यवर्ती क्षेत्र व्यवस्थापन समितिको अध्यक्षमा प्रकाश ढुङ्गाना निर्वाचित हुनुभएको छ । बुधबार कसरामा भएको निर्वाचनबाट उहाँ अध्यक्ष निर्वाचित हुनुभएको हो । युवा नेता ढुङ्गाना नेपाल कम्युनिष्ट पार्टी (नेकपा) चितवनका सचिवालय सदस्य समेत हुनुहुन्छ ।

व्यवस्थापन समितिमा चितवन, नवलपरासी, मकवानपुर र पर्सा जिल्लाका २२ वटा उपभोक्ता समिति आबद्ध छन् । सबै उपभोक्ता समितिका अध्यक्ष सोतह व्यवस्थापन समितिमा पदेन सदस्य रहने व्यवस्था रहेको छ । २२ उपभोक्ता समितिका अध्यक्षले मतदान गरेर व्यवस्थापन समितिको अध्यक्ष चुन्ने व्यवस्था छ । ढुङ्गाना भरण्डारभार उपभोक्ता समितिबाट प्रतिनिधि बन्नुभएको थियो । तीन प्रदेश, चार जिल्ला र १२ पालिकाको ७ सय २९ बर्गकिलोमिटर क्षेत्र चितवन निकुञ्जको मध्यवर्तीमा पर्छ ।

अध्यक्षमा निर्वाचित ढुङ्गानाले मानव वन्यजन्तुको बीचको द्वन्द्व न्यूनिकरणमा प्राथमिकताका साथ काम गर्ने बताउनुभयो । उहाँले मध्यवर्तीका नागरिकको समस्या समाधानमा आफूले काम गर्ने प्रतिबद्धता जनाउनुभयो । उहाँले भन्नुभयो “निकुञ्ज र मध्यवर्ती क्षेत्रको संरक्षण गर्दै मध्यवर्तीका वासिन्दाको अधिकतम हितमा हुने गरेको कार्य गर्ने छु ।” निकुञ्ज ऐन समय सापेक्ष परिवर्तन गरी द्वन्द्व न्यूनिकरण गर्नुपर्नेमा उहाँको जोड थियो ।

मध्यवर्ती क्षेत्र व्यवस्थापन समितिले संरक्षण, सामुदायीक विकास, आयआर्जन र संरक्षण शिक्षामा लगायतका काम गर्दछ । निकुञ्जको आम्दानीको पचास प्रतिशत मध्यवर्ती क्षेत्र व्यवस्थापनमा खर्च गर्ने प्रावधान रहेको छ ।