चेपाङमाथि ज्यादतीको आरोपमा वनमन्त्रीको राजीनामा माग्दै भण्डारामा प्रदर्शन

भरतपुर । निकुञ्जले चेपाङ समुदायमा ज्याजति गरेको भन्दै भरतपुरमा वनमन्त्री शक्ति बस्नेतको राजीनामा माग्दै प्रदर्शन भएको छ । हाम्रो नेपाल, हामी नेपाली संस्था र चेपाङ समुदायले सोमबार पूर्वपश्चिम राजमार्गको भण्डारा चोकमा प्रदर्शन गरेको हो ।

प्रदर्शनमा युवाहरुले राप्ती नगरपालिकामा सेनाको कुटाइबाट मृत्यु भएका राजकुमार चेपाङको हत्यारालाई कारबाही गर भन्दै वन मन्त्री बस्नेतको राजीनामा माग गरेका थिए । सो क्रममा आधाघण्टा चक्काजाम गरिएको थियो । उनीहरुरुले वनमन्त्रीले दिएको अभिव्यक्तिको समेत चर्को विरोध गरेका छन् ।

गत साउन १ गते राप्ती नदी आसपास क्षेत्रमा घोँगी टिप्न गएका राजकुमारलाई चितवन राष्ट्रिय निकुञ्ज सुरक्षार्थ खटिएका सेनाले नियन्त्रणमा लिएर कुटपिट गरी छाडेको र त्यसको केही दिनमै मृत्यु भएको दाबी परिवारले गर्दै आएका छन् । चितवनको राप्ती नगरपालिका–२ का घर भएका राजकुमारको साउन ८ गते उपचारका लागि भरतपुर अस्पताल ल्याउँदा नै मृत्यु भएको थियो ।