गाई काटेको आरोपमा चितवनको कालिकाका एक पक्राउ, चार फरार

कालिका (चितवन) । जिल्लाको कालिका नगरपालिकाबाट गाई कोटेको आरोपमा प्रहरीले एकजनालाई पक्राउ गरेको छ । पक्राउ पर्नेमा कालिका नगरपालिका वडा नंं. ३ दुईसय विगहाका हानुप तामाङ रहेको जिल्ला प्रहरी कार्यालय चितवनले जनाएको छ ।

कार्यालयका सूचना अधिकारी डिएसपी सूर्यबहादुर थापाका अनुसार स्थानीय सन्तबहादुर तामाङको घरमा गाई काटेर भाग लगाउँदै गरेको अवस्थामा प्रहरीले उनलाई पक्राउ गरेको हो ।

घटनामा संलग्न पाँच जनामध्ये अन्य चार जना फरार रहेको थापाले जानकारी दिनुभयो । सो ठाँउबाट बरामद गरिएको मासु स्थानीय जनप्रतिनिधि, भेटेनेरी विशेषज्ञलगायतको उपस्थितिमा प्रहरीले मुचुल्का उठाएर खाल्डो खनेर गाडेको छ । घटनाको विषयमा अनुसन्धान भइरहेको र फरार रहेकाहरुको खोजीकार्य जारी रहेको प्रहरीले जनाएको छ । पक्राउ परेका व्यक्तिलाई पशुपंछी कसुर सम्बन्धी मुद्धा चलाई कारबाही गरिने प्रहरीले जनाएको छ ।