पत्रकार अधिकारीको सह्रानीय काम, विवाह भोजको रकम कोरोना राहत कोषमा

चितवन । पत्रकार दिपेन्द्र अधिकारीले सह्रानीय कार्य गर्नुभएको छ । उहाँले आफ्नो विवाह भोजको रकम कटौती गरेर कोरोना राहत कोषमा सहयोग गर्नुभएको हो ।

उहाँले आईतबार नगद एक लाख रुपैयाँ इच्छाकामना गाउँपालिकाको कोरोना राहत कोषमा जम्मा गर्नुभएको छ । लकडाउनको समयमा विवाह बन्धनमा बाँधिनुभएका अधिकारीले भोजका लागि छुट्टाइएको खर्च रकम एक लाख रुपैयाँ इच्छाकामना गाउँपालिकाको कोरोना राहत कोषमा जम्मा गरेको बताउनुभयो । उहाँले भन्नुभयो “कोरोनाका कारण साथीभाईलाई पार्टी दिन पनि पाईएन, पार्टी दिने रकम कोषमा जम्मा गरेँ ।”

ईच्छाकामना गाउँपालिका वडा नं. ३ कमेरे स्थायी घर भएका अधिकारीले असार १४ गते कालिका नगरपालिका वडा नं.९ निवासी सिर्जन भण्डारीसँग विवाह गर्नुभएको थियो । सामाजिक दूरी कायम गर्दै सीमित उपस्थितिमा विवाह गरेर भोजको खर्च रकम कोरोना राहत कोषमा जम्मा गरिएको अधिकारीले बताउनुभयो । अधिकारी र भण्डारीद्वयले कोरोना परीक्षण गरेर विवाह गर्नुभएको थियो ।

अधिकारी र भण्डारीले गाउँपालिकाका प्रमुख प्रशासकीय अधिकृत सुकदेव लम्साललाई उक्त रकम हस्तान्तरण गर्नुभयो । अधिकृत लम्सालले उक्त रकम कोरोनाबाट प्रभावितहरुको सहयोगमा खर्च गरिने बताउनुभयो ।

अधिकारी चितवनबाट प्रकाशित हुने चितवन पोष्ट दैनिकमा कार्यरत हुनुहुन्छ । अधिकारी इन्सेक चितवनको प्रतिनिधि हुनुहुन्छ भने सप्तगण्डकी बहुमुखी क्याम्पसमा पत्रकारिता विषय प्राध्यापन गराउनुहुन्छ ।