आईसियूमा उपचाररत कोरोना संक्रमित बिरामी सार्ने नारायणी सामुदायिकलाई चितवन प्रशासनको स्पष्टिकरण

चितवन । आईसियूमा उपचाररत कोरोना संक्रमित बिरामीलाई जबरजस्ती अस्पताल सार्ने भरतपुरको नारायणी सामुदायिक हस्पिटललाई जिल्ला प्रशासन कार्यालय चितवनले स्पष्टिकरण सोधेको छ । कोरोना संक्रमित एक पुरुषको मृत्यु भएपछि सुरुवाती चरणमा उपचार गरेको नारायणी सामुदायिक हस्पिटललाई प्रशासनले स्पष्टिकरण सोधेको हो ।

भरतपुरस्थित नारायणी सामुदायिक हस्पिटलको आइसीयूमा उपचाररत भरतपुर–११ का ६८ वर्षीय पुरुषमा कोरोना संक्रमण पुष्टि भएपछि उनलाई तत्कालै सामान्य अक्सिनको भरमा कसैको अनुमति नलिई अस्पतालले भरतपुर अस्पताल पठाएको थियो । भरतपुर कोभिड–१९ परीक्षण प्रयोगशालामा गरिएको परीक्षणमा सोमबार दिउँसो ती व्यक्तिमा कोरोना संक्रमण पुष्टि भएको थियो । त्यसलगत्तै चितवन प्रशासन र चिकित्सकहरुले ती बिरामीलाई तत्कालै अन्यत्र नसार्न आग्रह गरेका थिए । तर नारायणी सामुदायिकले जबरजस्ती ती बिरामीलाई आइसीयूबाट निकालेर भरतपुर अस्पताल पठाएपछि उनको मंगलबार विहान ७ बजेर ५ मिनेटमा मृत्यु भएको थियो ।

चितवन प्रशासन र भरतपुर अस्पतालले आफूहरुको अनुमति बिना नै बिरामीलाई सारेको भन्दै आपत्ति जनाएका थिए । सोही विषयलाई लिएर जिल्ला प्रशासन कार्यालय चितवनले स्पष्टिकरण सोधेको हो । मंगलबार नै अस्पताललाई पत्र काटेर स्पष्टिकरण सोधेको प्रशासनले जनाएको छ ।