कोरोना अस्पतालमा दुई महिनापछि चोरीको किटानी जाहेरी

चितवन । भरतपुर कोरोना बिशेष (अस्थाई) अस्पतालमा चोरी भएको दुई महिनापछि किटानी जाहेरी परेको छ । भरतपुुर महानगरपालिकाको अगुवाईमा स्थापना गरिएको उक्त अस्पतालमा अनियमितता र चोरीको बिषयमा मंगलबार प्रहरीमा जाहेरी दर्ता भएको हो ।

भरतपुर महानगरपालिकाका उपप्रमुख सहित केही वडाका वडा अध्यक्ष, वडा सदस्य र कार्यपालिका सदस्यका तर्फबाट तीन जना वडा अध्यक्षले किटानी जाहेरी सहित उजुरी दर्ता गरेका हुन । अस्पतालमा भएको चोरीको विषयमा निस्पक्ष छानविन गर्न महानगरमा नेपाली कांग्रेसको तर्फबाट निर्वाचिन जनप्रतिनिधिहरुले महानगर प्रमुख रेनु दाहालसँग माग गर्दै आएका थिए ।

गत चैतको अन्तिम हप्ता नै भएको उक्त घटनाको सिसिटिभि फूटेज वाहिरिए पछि उनीहरु माथि कारवाहीको माग जनप्रतिनिधिहरुले गर्दै आएका थिए । फूटेजमा महानगरका लेखा अधिकृत फडिन्द्र खनाल र स्वास्थ्य शाखाका कर्मचारी सूर्य तिवारी सहित भरतपुर अस्पतालका कर्मचारी सञ्जय बराल देखिएका छन् । स्टोरबाट सामान लगेको आरोप उनीहरुलाई लागेको छ ।

फूटेज बाहिरीएपछि अख्तियार दूरुपयोग अनुसन्धान आयोग हेटौंडा कार्यालयले अस्पतालमा छापा मारेर कागजात लगेको छ । आफुहरुको माग सुनुवाई नभएको भन्दै जनप्रतिनिधिहरुका तर्फबाट वडा अध्यक्ष चित्रसेन अधिकारी, चन्द्रमित्र पण्डित र दामोदर न्यौपानेले सामुहिक रुपमा उजुरी दर्ता गराउनु भएको हो ।

उजुरी लिएर आईतबार वडा अध्यक्षहरु प्रहरी कार्यालय पुगेपनि उक्त दिन उजुरी दर्ता नभएपछि मंगलबार दर्ता गरिएको हो । घटनाका विषयमा जिल्ला प्रशासन कार्यालयमा पनि अनुसन्धान गरिरहेको जनाए पनि कुनै कारवाही प्रक्रिया अगाडि बढाईएको छैन ।

घटना लगत्तै महानगरको नेतृत्वमा सञ्चालित अस्पताललाई भरतपुर अस्पतालको जिम्मा लगाईएको थियो । त्यस यता कोरोना अस्पताल भरतपुर अस्पतालको व्यवस्थापनमा सञ्चालन हुँदै आएको छ ।