८२ जना कोरोना संक्रमित थपिए, सबै प्रदेश दुईका

चितवन । कोरोना संक्रमण दर बढ्दै गएको छ । सोमबार प्रदेश नं. २ मा थप ८२ जनामा कोरोना भाइरसको संक्रमण पुष्टि भएको छ । योसँगै प्रदेशमा संक्रमितको संख्या ६ सय ९५ पुगेको छ । विपी कोइराला स्वास्थ्य विज्ञान प्रतिष्ठान धरान, राष्ट्रिय जनस्वास्थ्य प्रयोगशाला टेकु र धुलिखेल अस्पतालमा गरिएको पीसीआर विधिको परीक्षणमा ८२ जनामा कोरोना संक्रमण पुष्टि भएको प्रदेश २ को सामाजिक विकास मन्त्रालयले जनाएको छ ।

सप्तरीको राजगढ़ गाउँपालिकाका १२ जना पुरुषमा कोरोना संक्रमण देखिएको छ । सिराहाको सूर्यनारायाण मरवैता क्याम्पस क्वारेन्टिनका ५ जना, धनुषाको धनौजी शंकर मावि क्वारेन्टिनका ४ जना, प्रादेशिक अस्पताल जनकपुरमा १ जना र हसंपुर नगरपालिकाका २ जना पुरुषमा संक्रमण पुष्टि भएको छ ।

त्यसैगरी महोत्तरीको लोहरपट्टी नगरपालिका क्वारेन्टिनका २ जना पुरुष, सर्लाहीको जनता मावि अगरवा क्वारेन्टिनमा ३२ जना, कविलासी नगरपालिका ४ जना र हरिपुर नगरपालिका २ जनामा संक्रमण देखिएको छ । यस्तै रौतहटको परोहा नगरपालिकाका १४ जना र यमुनामाई गाउँपालिकास्थित क्वारेन्टिनका ४ जनाको रिपोर्ट पोजेटिभ आएको छ ।